Gula 9
“Unsa man diay trabaho niya, Nang?”
“Siya nay mibarog karon nga executive Vice president sa Golden Gate Business Ventures, Inc. nga gipanag-iya usab sa pamilyang Ricarte. Kapin na sa usa ka semana nga wala mo-report si James sa opisina gitugyan lang niya sa iyang sekretarya ang mga bulohaton sa opisina.”
Nakapanglingo si Denia. Iyang nasuta nga gisakitan ug naguol gayod pag-ayo si James sa gibuhat sa hinigugma niini kaniya.
Wala dayon makatulog si Denia nianang gabhiona. Nagduladula si James sa iyang handurawan. Hipokrito siya kun dili niya angkunon nga nadani siya sa charisma sa ulitawo bisan nagmug-ot ang panagway niini sa iyang pagkakita apan mipatigbabaw gihapon ang boyish charm niini.
Sa dihang nakita niya si James kaganina, gipakaingon niyag usa ka bathala sa olympus ang kaambong nga gipasundayag sa iyang atubangan.
He was tall, tanned and impressively male. Itom ang baga nga buhok niini nindot og mata ug pointed ang ilong. Guwapo si James, sa laktod nga pagkasulti.
Pun-an pa sa kahimtang niini sa kinabuhi nga haruhay kaayo, dili gayod lisud si James nga higugmaon sa usa ka babaye. Alang kang Denia, salbahis ra kaayo ni Jinky Haber nga nakahimo pag-luib kang James.
Migawas si Denia sa iyang lawak-katulganan sa servant’s quarter kay dili gayud siya makatulog bisan lawom nang gabii. Nag-alindasay siya sa iyang higdaanan mao nga gusto siyang magpahangin sa gawas. -- Sumpayan pa