Room for rent

Gula 65

Ingon niadto ang routine sa akong kinabuhi. Hectic ang akong eskedyul alang sa duha ka lalaki nga nahimo kong kasawo sa kinawat-kawat nga kalipay -- ang akong katambayayong sa pagdula sa kalayo!

Nagpadayon ang panagtagbo namo ni Kenneth sulod sa mabugnaw’ng lawak matag Miyerkules ug Biyernes.

Samtang kami si Albert, wala miy gitamdang schedule. Basta makalugar, birada! Ang among gibuhat nga pagtagay sa lawasnong kalipay nasubli sa makadaghang higayon.

Kasagaran, sa iyang kuwarto namo buhaton ang pagtagbaw sa among lawasnong kahangol. Usahay sab siya’y mosulod sa lawak namo ni Denver. Adlaw o gabii, basta makahigayon, mo-score gyud kami si Albert.

Dihay higayon nga hapit mi masakpi ni Denver. Paglakaw sa akong bana paingon sa trabaho, misulod dayon si Albert sa among lawak. Wala mi maglangan, gitaak dayon namo ang tugkaran sa ikapitong langit.

Human sa mainiton namong pagtagay sa lawasnong kalipay, migawas si Albert sa lawak. Igo lang gyud tingaling nakasulod si Albert sa iyang lawak, nahiabot si Denver. Nakugang ko sa iyang pagsulod sa among lawak.

Sus! Nakatuaw ko sa hilom. Maayo gani kay nakagawas na si Albert sa lawak sa wala pa mahiabot si Denver. Wala pa gyud tingali itugot sa panahon nga masakpan mi si Albert sa akong bana.

“Nganong mibalik ka man?” Gipangutana ko si Denver.

“May nalimtan ko,” maoy iyang tubag. “Nahibilin ang akong driver’s license.”

Igo lang tuod niyang gikuha ang iyang driver’s license sa nahimutangan niini ug mibiya na si Denver sa among gipuy-an.

Nakaginhawa ko’g luag. Ug kadtong maong hitabo naghatag nako’g leksiyon nga kinahanglang dili gyud ko mokompiyansa. Kinahanglang doblehon gyud ang akong pag-amping aron dili ko masakpan ni Denver.

Nagpadayon ko sa pagpakasala sa kaminyoon namo ni Denver. Matag Miyerkules ug Biyernes, kang Kenneth nga turno ang paglipay nako. Si Albert motira bisan unsang adlawa basta makahigayon.

Hangtod nga usa ka adlaw niana, nabalitaan ko na lang nga nagtingkagol na si Kenneth sa bilanggoan. Nasakpan siya sa akto sa mga awtoridad nga nagpayuhot og shabu. --Sumpayan pa