Gula 8
“Namatikdan man gud nako nga ingon sa masulob-on siya,” ni Denia pa. “Mora’g walay kadasig ang iyang panagway. Daw may gihambin siyang bitterness sa iyang balatian.”
“Husto ka, Inday.”
“U-unsay buot mong ipasabot, Nang?”
“Tinuod nga may kasakit nga gihambin si James. Mao kini ang hinungdan nga pipila na ka adlaw nga kanunay lang siyang nagmuok sulod sa iyang kuwarto.”
“Unsa man diay nahitabo, Nang?”
“May hinigugma si James, siya si Jinky Haber. Sa akong nasayran si Jinky na unta ang iyang dad-on sa altar sa kaminyoon. Ordinaryo lang og kagikan si Jinky apan wala kini igsapayan ni James. Dili usab mata-pobre ang iyang mga ginikanan ug wala sila’y pagsupak sa pagpakigrelasyon ni James ngadto kang Jinky. Pero walay suwerte si James kang Jinky.”
“Nga-ngano man diay, Nang?”
“Nadiskubrehan ni James dili pa lang dugay nga dili kay siya lang ang lalaki sa kinabuhi ni Jinky. Gi-live in na diay si Jinky sa usa ka lalaking adik. Gitonto lang diay si James ni Jinky. Nakigrelasyon kini kaniya tungod kay buot lang niining makapanghantok.”
“Sakit diay kaayo ang gidangatan sa gugma ni Sir James,” wala kapugngi ni Denia nga mobatig kaluoy ngadto sa lalaki.
“Mao gyud,” ni Nang Luding pa. “Nagtuo man gud siya nga sinsero si Jinky sa ilang relasyon. Lakip ang iyang trabaho naapektohan sa gibuhat sa iyang hinigugma tungod kay gikaguol kaayo niya ang nahitabo.” -- Sumpayan pa