Ang bana kong guwapo

Kinse anyos pa lang ako apan daghan na kaayong mga ulitawo nga moanha sa amo aron mamisita. Apan istrikta ang akong lola kay diha man ako magdako kaniya sukad nagbulag ang akong mga ginikanan sa gamay pa ako.

"Uy, mga ulitawo, pamauli una mo kay bata pa kaayo ning akong apo. Unya na lang mo pamalik inig-abot niya og desiotso."

Ingon niana ka istrikta ang akong lola. Bisan sa among eskuwelahan, daghan ang magsunod-sunod nako ug ihatud ako sa among balay. Apan dili sila makasaka kay naa si lola sa hagdanan naglingkod ug dili mopahawa hangtud dili mamauli ang mamisita.

Usa ka higayon niana, didto ako sa party sa among eskuwelahan. May miduol kanako nga ulitawo nga sa akong tan-aw kapin na sa 20 anyos. Guwapo kaayo siya ug puti ang iyang pamanit dili sama sa ako nga tabunon. May pagka-mestiso siya ug ang iyang mga mata brown ang kolor.

"Miss, mahimo ba nga makig-ilaila ko nimo?"

"Mahimo," akong tubag, "ako si Ellen Chavez--ikaw?"

"Ako si Darling Tundag," iyang tubag.

"Darling," matud ko nga mingisi, ''duna bay ngalan nga Darling?"

"Duna, ako diay," tubag niya. "Bitaw Len, ang tinuod kong ngalan, Lilio pero ang akong inahan kun motawag nako sukad pa sa gamay pa ako, ingon niini, "Darling pauli na kay gabii na" busa hangtod karon mao na kana ang tawag nila nako."

Gihatud niya ako sa among balay ug sa dako kong kahibulong, mitindog ang akong lola nga naglingkod sa hagdanan ug gipasaka siya. Sukad niadto kanunay na nga mamisita si Darling nako ug siya lang ang pasak-on sa akong lola.

Pila lang ka bulan ang milabay, gipakasal kami ni lola ug sa iyang mga ginikanan. Walay trabaho si Darling ug wala usab siya’y nakat-onan nga trabaho, busa miipon una mi sa mga ginikanan niya. Kugihan kaayo siya ug mapinanggaon kaayo nako. Usa lang ka butang ang dili makalikay si Darling. Dugokon kaayo siya sa mga babaye tungod sa iyang ka-guwapo apan nagpabilin siyang mapinanggaon nako.

Nakat-on si Darling sa nagkalainlaing trabaho nga maoy nakapagpa-abroad niya. Maayo na ang among kahimtang ug hapit na mo-40 anyos ang among panagtipon ug pito ang among mga anak.

"Mahal kita Ellen ug ako ang mipili nimo ug dili ko ikaw ibaylo ni bisan kinsa," matud niya kanako. Hangtud karon nagpabilin siyang mapinanggaon nako. (Kataposan)