Nagtakoban nga pagbati

Gula 5

“Nasayod na siya nga may bag-ong katabang dinhi. Gusto siyang makakita nimo. Ayaw kabalaka. Buotan si James.”

“Naunsa man diay kana si James, Nang? Nga-nganong magpahatod-hatod man siya sa iyang pagkaon ngadto sa iyang kuwarto? M-may kakulian ba siya sa lawas?”

Wala baya. Gusto lang gyud niyang mag-inusara ug maglublob sa iyang kuwarto kanunay.”

Mikunot ang iyang agtang nga nahitutok kang Nang Luding.

“May lig-ong hinungdan kun nganong naingon niana si James, Day,” ni Nang Luding pa.

“Kay ngano man diay, Nang?” Sukit ni Denia. “U-unsa man diay nahitabo niya?”

Motubag na unta si Nang Luding dihang nabati nila ang tingog ni Mr. Ricarte nga nagtawag niini. Gibiyaan sa lagas si Denia aron pagsusi kun unsay isugo sa ilang agalon ngadto niini.

Naghinuktok si Denia. Nakahatag kaniya’g interes ang pagkatawo ni James. Karon pa lang gani, ingon sa naghinamhinam na siyang makita kini.

Mituktok si Denia sa pultahan sa lawak ni James. Dala na niya ang mga pagkaon niini nga gipahimutang sa gibitbit niyang tray.

“Abli kanang pultahan.”

Nabati ni Denia ang tingog sa usa ka lalaki didto sa sulod sa lawak. Gihinay niya’g tukmod ang palid sa pultahan. Dihang naabli na kini, mihinay siya’g sulod. Mikuba ang iyang dughan.

Maoy misugat sa iyang panan-aw ang bayhon sa usa ka lalaki nga naglingkod sa ngilit sa kama nga masulob-on kaayo ang hitsura. -- Sumpayan pa