Grade one si Juan

Unang adlaw sa pagbukas sa klase sa mga eskuylahan. Naghuot ang mga bata sa lawak saringan sa Grade One nga gimaestrahan ni Ma’am Fe Limbarok. Ang mga bata maukitong nagatutok kang Juan nga naglingkod didto sa luyo nga bahin nga lingkuranan. Ulitawo naman gud si Juan, 20 anyos ug nakuryoso ang kabataan.

Ilong tuwapos na si Juan sa baryo ug karon lang makahunahuna sa pag-eskuyla sa Grade One. Inay mobati og kaulaw ngadto sa mga bata nga nagatutok kaniya, gimiramirahan hinuon ni Juan sa iyang mga kamot ang kabataan.

“Halo ninyong tanan! Klasmeyt ta, ha...?”

“Ngee! Grade One pa diay si Manoy...!”nangatawa ang kabataan nga daw nagtamihid ug nagbugalbugal kang Juan. Nahilom ang kabataan sa dihang mitingog si Ma’am Fe Limbarok.

“Ayaw mo’g bugalbugal! Oo, klasmeyt ninyo ang inyong Manoy Juan! Si Juan Tangcawan...!” sa guwapang maestra nga mapahiyumong mipasiklap kang Juan sa iyang gilingkuran. “Grade One pa siya...!”

Nagkasugat ang tinan-awan nila ni Juan ug Ma’am Fe Limbarok.

Sa buhi pa ang mga ginikanan ni Juan sa ilang baryo nga usa ka mag-uuma, wa niya panumbalinga ang mga pahimangno ug sugyot niini nga mo-eskuyla. Di siya ganahan nga mo-eskuyla. Gipalabi niya nga miabag sa iyang amahan sa pagtikad sa yuta. Sayo siya nga nakat-on sa panguma nga wa gyud makatunob og eskuylahan. Gani, sa iyang kaugalingon nga pangalan, di gyud siya makamao mosulat. Sa dihang nagdungan pagpangamatay ang iyang mga ginikanan nga nahaapil sa pagkadisgrasya sa bus pasaheroan nga nalimbuwad sa bung-aw kay naharos ang preno niini, diha pa makaamgo si Juan kun unsa diay kamahinungdanon nga makatunob og eskuylahan.

Tungod kay kugihan si Juan, haruhay ang iyang pagpuyo sa ilang baryo. Maayong pagkatikad niya ang iyang kabilin nga umahan. Hilabihan katambok sa iyang kamaisan ug utanon. Misanay usab ang binuhi niyang hayupan, sama sa mga baboy, manok, kanding ug baka. Namunga usab ang iyang prutasan sama sa tambis, santol, kaymito ug mangga. Daghang kadalagahan nga hilom nangindahay nga unta, maoy makapapitik sa kasingkasing sa ulitawo sa natad sa gugma, apan nagpabilin nga maulawon si Juan sa pagpangulitawo og mga dalaga. Tungod kay wa siya makatunob og eskuylahan.

Si Ma’am Fe Limbarok nga katalirungan ni Juan, maoy nahimo niyang suki sa pagpalit og mga prutas ug preskong utanon sa ilang baryo. Ang guwapang maestra maoy nagdasig niya nga sa pag-eskuyla sa Grade One.

“Sus, ayaw gud kaulaw, John...!” ni Ma’am Fe Limbarok usa ka buntag niana nga mipalit og preskong utanon kang Juan sa iyang umahan. “Eskuyla gyud! Importante nga makamaong mosulat ug makabotar! May panahon pa, uy, John...!” gisubli paglitok sa maestra ang nindot nga angga niya kang Juan.

Ug mao kini ang hinungdan ngano nga nadasig si Juan sa pag-eskuyla sa Grade One sa pagbukas sa klase. Si Ma’am Fe Limbarok ang iyang inspirasyon. Nahigugma siya sa maestra! Ug hilom siyang gipasaligan sa guwapang maestra nga dawaton ang gugma ni Juan kun makalampos siya sa pag-eskuyla, bisan sa elementarya ug hayskol man lang. (Kataposan)