Room for rent

 Gula 60

Daw sa nahubsan kami sa hangin dihang nagkadungan kami’g abot sa finish line sa katagbawan sa among pagtagay sa lawasnong kalipay. Ang pataob sa tumang kalalim ingon sa milumos sa akong lawas ug kalag.

Mikawas dayon si Albert. Mibangon ko ug milingkod sa ngilit sa katre. Gitalikdan ko siya nga naghigda samtang nagpahuwas sa kakutas nga iyang gibati tungod sa makaugtas namong kombate sa kama.

“Gawas na dinhi,” giingnan ko siya. “Lakaw na. Tingali ma-late ka na sa imong trabaho.”

“Mo-half day lang ko karon,” maoy iyang tubag.

Wala na ko motubay sa iyang gisulti. Sa akong paniid, mora’g wala pa siya’y planong mogawas sa lawak.

“Wa ka ba mahadlok nga masakpan ta sa akong bana?” Gipangutana ko siya samtang nagpabilin kong nagtalikod niya.

“Aware ko nga anytime now mahimong mahitabo kana,” matud ni Albert. “Pero di ko gustong maghunahuna bahin niana. Ang gusto kong hunahunaon kanunay mao ang pleasure nga akong natagamtaman uban nimo.”

Wala ko motingog.

“Ikaw diay,” matud ni Albert.“Unsay imong gibati karon?”

“Nahadlok,” maoy akong tubag. “Nabalaka ko nga tingalig moabot ang panahon nga masakpan ta ni Denver. Lisod ang paglikay sa tentasyon labina kay nagtipon ta’g puyo sa usa lang ka balay. Bisan tuod nga managlain ang atong giokupar nga kuwarto pero...”

 “Kun unsa man unya’y mahitabo, laomi nga dili ko ikaw pasagdan, Phoebe. Kun mabulgar ang atong binuhatan ug isalikway ka ni Denver, andam kong makig-unong nimo.”

 “Maayo lagi’g ingon lang niana ang mahitabo -- nga igo lang kong isalikway ni Denver. Kun simbako pamatyon ta niya sa higayon nga mahibaw-an niya ang atong sekreto? Unsaon na man lang?”

“Manghinaot lang ta nga dili ingon niana ang mahitabo.”

Ug gilain na namo ang tema sa among panagsulti. Gilikayan namo ang paghisgot sa mga butang nga maghatag og kabalaka.

Unya, paglabay sa mga gutlo, akong namatikdan nga ingon sa kondisyon na sab si Albert. Gihagkan niya ang akong ngabil. -- Sumpayan pa