Konsensya

Nahibulong ko sa pagpakigkita ni Sandra kanako sa Chowking duol sa simbahan sa Santo Niño. Nagduko siya ug wa mokaon sa gi-order ko nang daan nga paniudto alang namong duha. Una kong nahiabot sa Chowking kay kaniya.

“Tell me, Sandra, nganong kalit kaayo kining pagpakigkita mo nako? Wa nimo isulti nako dihang gitawgan mo ako sa selpon kun unsa ang hinungdan niining tanan.” Miinom ko sa tubig sa akong baso.

Gitangtang ni Sandra ang gisul-ob niyang sunglass. Nahingangha ko kay nanghubag ang iyang mga mata.

“W-what’s wrong, Sandra?”

“Nagbasol ko nga wa tumana ang imong tambag, Cherry. Nagbasol ko kun nganong wa ko maglikay kang Paul.”

Naghilak si Sandra ug hapit di siya makatan-aw kanako. Namahid siya sa iyang mga luha sa gikuptang panyo. Hisabtan ko na ang iyang problema. Unang gugma ni Sandra si Paul. Apan naminyo kini’g laing babaye. Nagminyo usab si Sandra kang Carlos nga usa ka seaman, sama sa akong bana.

“Nakonsensiya na ko sa kinawat-kawat namong relasyon ni Paul.”

Mibakho si Sandra. Naluoy ako kaniya. Nasayod ako kun unsa kamahal niya si Paul. Naminyo siya kang Carlos nga wa siya’y gugma. Nasayod ako niining tanan kay suod kong higala si Sandra ug kauban kami sa opisina sa usa ka pribadong kompaniya.

“Husto ka, Cherry. Minyo na ko ug si Paul. Angay unta kong maglikay kaniya. Natental gyud ko kay kanunay siyang motawag nako sa selpon. Magpadala’g mga love messages.”

Nakapanglingo ko sa nahimong sala ni Sandra sa iyang bana.

“Mopauli si Carlos sa sunod semana, Cherry. Unsay akong buhaton?”

“Sultihi siya sa tinuod, Sandra. Dawata kun unsay mahimo niyang desisyon sa imong pagluib kaniya. Ikaw ra say mabasol sa imong problema karon. Gisultihan na tika nga duol ra ang tentasyon sa sama kanato nga tua sa layo manarbaho ang atong bana. Ako bitaw, naglikay sa mga pundok-pundok. Di gani ko mosuroy kay di ko gustong matental sa pagpakasala sa akong bana.”

Usa ka bulan human sa among panagsulti ni Sandra, miduaw siya kanako sa akong gipuy-an. Malipayon siya. Sa akong tan-aw kaniya, mora’g duna nay kalinaw ang iyang kaugalingon.

“Gipasaylo ako ni Carlos, Cherry. Nagkasabot kami nga di na siya manarbaho sa barko. May tinigom kami ug maoy iyang himuong puhonan sa nahunahunaan namong negosyo.”

“Maayo kun mao kana,” Sandra. I’m happy for that.” Gidalitan ko’g juice ang akong higala.

“Maglikay na gyud ko sa pagpakasala kang Carlos. Buotan siyang pagkabana. Love gyud kaayo ko niya bisan pa sa nahimo kong kasal-anan sa among kaminyoon.”

“Suwerte ka, Sandra, nga nakabana’g nagmahal gyud nimo. Busa, bugtii sab kini sa imong kamatinud-anon na ngadto kang Carlos.”

“Gisaad ko na sa akong kaugalingon nga magbinuotan na sa akong pagka-asawa, Cherry. Di na ko gustong makonsensya pag-usab. Lisod man diay nga mahimong kaaway ang atong konsensya. Bisag sa atong pagkatulog, tulisukon kita sa atong tanlag.”

Mibiya si Sandra sa akong gipuy-an nga nagbaton sa tumang kalipay. Nagpasalamat ako sa hilom sa Diyos nga wala maungkag ang kaminyoon sa akong labing suod nga higala ug sa iyang bana. Nakasiguro na ko nga di na magpatental si Sandra sa laing lalaki. Nakatental na ako niini. --- Kataposan