Ang iring sungkaban

“Dadikol, di kaha ta hibaw-an ni Art ning atong kinawatkawat nga kalipay?” sukot ni Mely usa ka udto niana human sa among pagtagay sa lawasnong kalipay sud sa iyang lawak nga inabangan balay sa sudlonong bahin sa dan Urgello.“Ay’g kabalaka Mel, nag-amping kong di siya makahibawo sa atong relasyon. Wa man seguroy mga balhiboon og dila ning dapita wa may maagian nagtsismis nga sagad makita sa dapit nga sudlonon ang mga balay”, nako pa ngadto kang Mely samtang nagsul-ob sa akong karsones aron mopauli nas amo sa Mambaling.

Nakaila nako si Mely sa usa ka imnanan. Promo siya sa beer niadto ug natural, seksi ug maayong modag customer aron daghan og order. Unang nalambigit sa iyang kinabuhi mao usa ka retiradong opisyal sa kapolisan, si Art.

Gipabalhin siya’g puyo ni Art gikan sa usa ka boarding house ngadto sa inabangang balay sa Urgello. Sudlonon aron di daling hibaw-an ug matultolan sa asawa ni Art. Nagkasinabtanay kami si Mely sa wa pa siya paundanga sa iyang trabaho ni Art nga mihatag kaniya sa iyang mga panginahanglan hinungdan nga dali siyang nakabit ni Art. Natagamtaman ni Mely ang kaharuhay nga wa niya matilawi sa ilang dapit sa probinsya.

Apan gumikan kay matawag tag tiguwang naman si Art,kuwang na ang gikinahanglang lawasnong kalipay nga gipangita sa usa ka batan-on sama ni Mely. Ako lamang ang makatagbaw ni Mely sa maong panginahanglan. Nagpangidaron pa si Mely og 24 ug maguwang lang ko niyag tulo ka tuig. Maingon tang pulos may pwersa pa ibabaw sa kama.

Nag-pills siya sa paglikay nga mamunga ang among gibuhat nga mao unyay hinungdan nga mabuking ang among tinagong relasyon.

Apan wa gyud diay aso nga makumkom. Usa ka udto niana, giduaw ko na usab si Mely sa iyang gipuy-an. Wa na lang ko mahibung nga mingaw ang sud sa balay ug milahos ko sa sala nga sagad di niya trangkahan ang pultahan kun adlaw sa akong tingduaw kaniya.

Paghitangka ko sa sala, usa ka gahing butang ang kalit mitugpa sa akong agtang.

“Salbahis!” tingog ni Art ang akong nabati kay medyo napawong akong panan-aw gumikan sa kakusog sa gihapak sa akong agtang.

Nahasarasay ko ug dali kong gitapin-an ang akong agtang nga misugod na pag-agas ang dugo. Wa ko katingog nga nagtan-aw sa pusil ni Art tumong kanako.

“Ikaw diay ang iring nga tigsungkab sa tinaguan kong sud-an, ha?! Panguros na lang daan kay muhonong na ang imong edad karong adlawa, animala ka!” singgaak ni Art nga labihang sukoa.

Niadtong higayona, mora kog ilaga nga nakorner sa iring. Maayo na lang gani kay nakahunahuna pa kog patid sa bagang trapo sa tiil paingon sa nawong ni Art mikaratil kog dagan sa gawas.

Pastilan kun di pa ko hinan-aw og mga salida ni James Bond, mora na unta kog boxer nga si Hatton nga maayong pagkahay-ad nga naigo sa left hook ni Pacman,

Nabalitaan na lang nako paglabay sa pipila ka adlaw nga mipauli si Mely sa ilang probinsya kay nahibaw-an sad diay sa asawa ni Art ang ilang relasyon. Di ako ang nagbuking nila, ha? Katapusan