Si Timoy lang intawon ang sumsoman sa ilang pagka-libakira ug pagka-tsismosa. Basta magkatapok na gani sa tindahan ni Iska-Gundoy ang mga libakira nga sila si Tanciang, Monica, Dorotea, Dulcing, Anastasia ug Salud way lain silang hisgotan kondili si Timoy ra gyud.
Si Timoy ilang silingan tua sa may kiliran sa bungtod ang payag niini. Mingaw karon ang pagka-butang ni Timoy kay siya na lang usa ang nahabilin sa ilang payag. Ang iyang asawa nga si Tiray mikuyog og laing lalaki.
Ang gikuyogan pa ra ba gyud mao si Antoy, ang pinaka-bugoy dinhi sa ilang balangay. Dugay na man kunong giiring-iring ni Antoy si Tiray. Gani, may nakakita man nga iniglakaw ni Timoy paingon sa iyang trabaho sa Poblacion, kay duna may gitukod nga dakong balay ang Kapitan sa barko nga si Eduardo nga taga Poblacion, ug si Timoy gikuha ni Engr. Mascardo nga usa sa iyang mga panday, mopuli man dayon si Antoy og saka sa taas sa payag nilang Timoy.
Ug tungod niini, ang tanang mga silingan ni Timoy nahibawo gyud sa pagluib ni Tiray kang Timoy.
Dihay kausa hapit gyud hisakpi ni Timoy si Tiray dihang mipauli ang nahauna ug niadtong higayona sila si Tiray ug Antoy matagbawon kaayong nagkatkat sa bungtod sa himaya. Kondili pa lang tungod sa igham ni Timoy hiabtan gyud ni Timoy si Antoy nga abtik kaayong miambak agi sa bentana.
“Kinsa tong mora’g dunay tingog sa lalaki nga akong nadunggan sa taas, Tiray?” nangutana si Timoy. Nakita ni Timoy nga nagkadusingot ang hubo nga lawas ug nakalkag ang mga buhok.
“Da, radyo to, uy. Sayod ka na man mahilig man ko maminaw sa mga drama. Naa, o, bag-o pa nakong gipawong,” tubag pamakak ni Tiray. Ug wala na lang poy libog nga motuo si Timoy.
Ug hangtod nga miabot ang adlaw nga gibiyaan gyud si Timoy. Mora’g baka nga mongaab sa paghilak si Timoy matag gabii nga magpanawag sa pangalan ni Tiray.
Ug aron malingaw iyang adtoon si Mano Akoy, ang tiguwang nga nagpuyo sa atbang nga bungtod. Gidungogdungog kini si Mano Akoy nga ungo kay may nakakita nga nagtuwad kini duol sa may tulay.
Ug duna say nakakita kang Mano Akoy nga nagdalag daghan kaayong karne gikan sa menteryo usa ka gabii niana. Ug kay naluoy ang tiguwang kang Timoy iya kining pakan-on sa dili pa kini mobalik sa iyang payag ug hangtod nga natakdan si Timoy.
Magkuyog na silang duha si Mano Akoy sa pagpangabat. Ug may nadungog na sa pikas baryo nga dunay gibalbal. Unya usa ka gabii, nagkatapok na pud ang mga libakira ug tayming kaayo dihang nahilabay si Timoy ug dagko kaayo ang ilang mga tingog ug si Timoy maoy ilang topic.
“Pasagdi lang nang mga libakira diha, Timoy, ingon man gyud na sila ana magluya kun dili makalibak,” ni Mano Akoy pa nga nagsugnod sa giluto niining karne. “Aw, kun gusto ka, karong gabii imo silang atngan, tagsatagsa lang, aron duna pud tay maluto matag adlaw...”
Tuod, nakugang na lang ang mga lumolupyo dinhi sa ilang balangay dihang matag gabii gianam-anam pagbalbal ang mga libakira nga sila si Tanciang, Dorotea, Anastasia, Dulcing ug Salud.
Silang lima gihurot gyud sa pagbalbal ug nakapait kay ang gikuha ang ilang atay, kasingkasing, tungol ug ilogon. Nahadlok na ang mga lumolupyo sa nahitabo sa mga libakira. Sa payag ni Mano Akoy sige lang silang higop sa sabaw sa karneng linuto sa tiguwang ug nanambok si Timoy. (Kataposan)