Just Once

Gikusi ko’g pino ang kilid ni Samuel dihang may gihunghong siya nako samtang nanan-aw kami’g sine. Nakatig-ik siya apan nagkatawa. Nahalingi namo ang uban pang nanan-aw sa salida.

“Ikaw, ha!”

“Abi ko’g makalusot.”

“Tana, uy! Manggawas na ta dinhi. Nahuman na ang salida.”

Mao pa lay pagngitngit sa kagabhion sa among paggawas sa sinehan. Gidala ko ni Samuel sa usa ka snack bar sa Colon.

“Di mahimo ang imong gusto, Sam. Nag-eskuyla pa ta. Ayaw na paghangyo og ingon niadto nako, ha, aron di ko masuko nimo.” Nagmugtok ang akong hitsura. Nakasabot si Samuel nga naglagot ko niya.

“Sorry, Carmen, Promise, di na to mausab.”

Nakita ko ang kamatinud-anon sa nawong ni Samuel ang iyang pagsaad nako. Kalit nga nahanaw ang kasuko ko niya.

“Mikuyog ko nimo sa sinehan kay maoy atong sabot nga igo lang tang manan-aw. Apan milapas ka sa atong gikasabotan. Yes, unsa ra ba gud nang hawok. Apan basig di ta makakontrolar sa atong kaugalingon. Basig di ta makahuman sa kurso nga atong gikuha.”

Wa motubag si Samuel. Apan miyango siya. Gipahiyoman ko na siya. Nawala ang iyang kaguol. Nadasig na siya ug mapahiyumon na.

“So, gidawat mo ang akong pag-sorry?”

“Of course, yes, Sam. Gimahal tika. Ikaw ang una ug kataposan kong gugma.” Unya nahikatawa ko. “Corny ba?”

“I love you, too, Carmen. Isaad ko, ikaw lang sab ang akong mahalon. Ug mao gyud nang love. Makakorni.”

Mikatawa og kusog si Samuel. Nahiuban ko sa iyang kamalipayon. Ingon kami niini si Samuel. Mora’g way kinutoban ang among pagmahal sa usag-usa.

Matag Domingo, mag-uban gyud kami sa pagpanimba. Gilig-on namo ang among relationship sa sulod sa simbahan. Tulo ang nangulitawo nako. Ang duha pulos anak og adunahan. Pobre lang ang parents ni Samuel. Nag-working student siya sa gitunghaan niyang unibersidad. May mga higayon nga ako ang mobayad kun mag-esnak kami kun manuroy sa siyudad sa panahon nga wala kami klase.

Bisan mga anak og dato ang karibal ni Samuel sa iyang love nako, apan siya ang akong gisugot kay siya ang akong gimahal. Ug wala ko masayop sa akong desisyon. Namatud-an ko nga love sab ko pag-ayo niya.

Nanglabay ang mga adlaw. Hangtod nga nakahuman kami si Samuel sa kolehiyo. Nagkadungan kami sa pag-graduate. Human sa among gradwasyon, nianang pagka-ugma, nanuroy kami si Samuel.

“At last, mga propesyonal na gyud ta, Carmen.”

“Tungod kay wa ta magpatental, Sam. Kun nagpadala pa ta sa atong feeling, tingali naminyo ta nga wa makahuman og kurso.” Gikidhatan ko ang akong boyfriend. Mibalos sab siya sa pagkidhat.

Nangaon kami sa usa ka fastfood. Pagkahuman nan-aw kami’g sine. Sa balcony kami manglingkod. May gihunghong si Samuel nako. Wala ko makaliti sa iyang gihangyo.

“Nakahuman na bitaw ta sa pag-eskuyla, Car. Just once lang, o.”

Dugay kong naghunahuna. Unya mipahiyom ko. Pagkadugay nang panahon nga naghangyo si Samuel sa paghalok nako.

“Okay. Just once lang, ha?”

Mipiyong ko dihang midapat ang mga ngabil ni Samuel sa akong mga ngabil. -- Kataposan