Room for rent

Gula 50

Mibati ko’g kalagot. Kinsay dili nga sa unang hugna pa lang sa among pagdula og mahjong sa balay nila ni Roger-Luz, gisugat man dayon ko og pilde. Demalas! Nagpalihi og pilde.

Sa sunod nga hugna sa pagdula, napilde gihapon ko. Ug kadto nasundan pa’g laing duha ka kapildehan. Maong napikal na ko’g maayo.

Maayo gani kay sa misunod nga hugna, nakadaog na gyud ko. Arang-arang, nakaingon ko sa hilom. Nakaginhawa ko’g luag.

Abi ko’g magsigedas ug magpadayon na ang akong pagpanaog. Nasayop diay ko. Igo lang diay kong gipatilaw og usa ka daog. Kay sa misunod nga hugna sa among pagdula, nakatilaw ko’g sagunson nga kapildehan!

Dihang nahurot na ang gidala kong puhonan, mitindog na ko gikan sa akong gilingkoran aron kapolihan ko’g laing magdudula. Si Kenneth maoy mibanos sa akong gilingkoran.

Mipauli kos balay nga nagminghoy ug huyhoy ang mga abaga. Ingon gyud tingali niini ang mahitabo ug masinati sa usa ka pildero sa sugal. Pag-abot nako sa balay, midiretso ko sa lawak ug natulog.

Gipukaw ko sa kurit sa kagutom nga mikawras sa akong tiyan. Gikawhat ko ang akong cellphone nga gipatong sa lamesita. Gitamdan ko kini. Mao pay akong pagkasayod nga pasado ala una na diay sa kahaponon. Mao diay nga gigutom na ako!

Migawas ko sa lawak. Mipaingon dayon ko sa kusina. Nagsukad og kan-on ug sud-an. Ug mikaon sa nalangan na nga paniudto.

Human makakaon, mibalik ko’g sulod sa lawak. Nahinumdom ko sa pocketbook nga nobela nga akong napalit didto sa Metro Gaisano. Kadtong nobelang Binisaya nga gi-pocketbook nga nag-ulohan og Bahandi Sa Gugma nga sinulat ni Uriel Cruz Vallecera. Wala ko pa kini mabasa.

Gikuha ko ang maong pocketbook gikan sa gibutangan nako niini. Mipahimutang ko’g higda sa kama ug gisugdan kini pagbasa. Mi-concentrate kos akong gibasa. Hangtod nga nadala ko sa kanindot sa flow sa estorya ini.

Miulan nianang pagka-alas singko. Kusog kaayong ulan. Matag karon ug unya mosiak sa langit ang suwab sa kilat nga pagasundan sa dinahunog sa dalugdog nga daw may mga batong dagko nga gipangligid sa langit.

Nahiuli si Albert nga labihang basaa. Namitpit siya sa kabasa. Igo lang siyang mitimbaya nako ug misulod na siya sa iyang lawak aron maka-ilis og ugang sinina.

Pagkagabii, wala dayon ko matulog. -- Sumpayan pa