Ulipon sa gugma

Gula 53

Na-realize ni Abigail nga dili masulbad sa hingpit ang problema kun padayon niyang likayan si Harvey. Kinahanglang magkadayganay na sila!

“I love you, Abigail,” matud ni Harvey. “Tuohi ko. Tinud-anay ang akong tinguha diha nimo. Ikaw ang babayeng matuod kong gihigugma.”

“Unsaon man nako pagtuo sa imong gisulti nga nakigrelasyon ka man kang Krista ug gani mabdos na man siya?” Pangutana ni Abigail.

“Si Krista ang gipahungawan ko sa akong gibati diha nimo. Niadtong panahona wa koy kaisog sa pagpadayag sa akong gugma diha nimo tungod sa kahadlok nga maguba ang atong friendship kun mangahas gyud ko sa pagpanguyab nimo. Maong si Krista ang nabuthan sa tanan. Pero di ko malipayon sa among relasyon kay ikaw ang gisinggit sa akong kasingkasing.”

Wala motingog si Abigail. Gihinuktokan niya ang tanang gisulti ni Harvey, gikan sa dagko hangtod sa gagmay nga mga detalye. Ug inanay siyang nakombinser sa katinud-anay sa tinguha ni Harvey kaniya.

“Karon gusto kong masayod kun katugbangan mo ba usab og samang pagbati ang gugma ko kanimo, Abigail,” nagkanayon si Harvey.

“G-gihigugma ko usab ikaw, Harvey,” wala na makapugong si Abigail pagpadayag sa kamatuoran. “Sama nimo, gipahungaw ko lang usab kang Michael ang akong gibati alang nimo. Nagtuo man gud ko nga imposibleng magkatakdo ang atong mga pagbati tungod sa dakong kalainan sa atong kahimtang ug personalidad. Dili man gud ko guwapa sama kang Krista. Dili ko nimo ikapasigarbo ngadto sa katilingban nga imong gipuy-an.”

“Ulipon ako sa gugma, Abigail,” ni Harvey pa. “Ug bisan kinsa ug unsa ka pa, higugmaon ko gihapon ikaw. I love you very much.”

Naggakos sila. Hugot kaayo ang ilang paggaksanay.

“May problema ta,” ni Abigail dihang milugak ang ilang panaggakos. “Si Krista. Unsaon na man lang si Krista? Mabdos ra ba kaha siya?”

“Nagbuwag na mi ni Krista,” ni Harvey pa. “Nasakpan ko siya sa makaduha ka higayon nga mikuyog og laing lalaki sulod sa usa ka motel. Dihang ako siyang gisudyaan, miangkon siya nga dili ako’y matuod nga amahan sa iyang gisabak. Di man ako’y naka-virgin niya maong wa koy interes nga magpakasal niya kay nagduda kong iya lang kong gitonto.”

“Kun mao, wa na diay tay problema,” matud ni Abigail. “Nagbuwag na man sab mi ni Michael. Wa mo-prosper ang among relasyon.”

Naggakos na sab sila. Ug nag-akob ang ilang mga ngabil. -- Kataposan