Linugdangan sa abuso

Pagmata nako human sa pag-opera sa doctor nako, nakadungog kog mga tawong nag-awit dapit sa akong too. Nilingi ko bisag lisod akong paglihok ibabaw sa akong estretser nga gihigdaan nako. Di layo sa akong nahimutangan dapit sa akong too nakita ko ang tulo ka tawo nga nag-uniporme og berdeng mga saput.

Naa pay putos ilang mga ulo nga berde sab og bulok. May tabon sab sila sa ilang mga baba apan ila nang gipaubos ngadto sa ilang ubol-ubol. Sila diay ang nanag-awit og kanta sa pag-ampo.

Ang ilang giawitan usa ka hamtong babaye nga naghigda sa estretser. Wa na maglihok. Daw hinanok sa iyang pagkatulog. O patay na ba kaha! Patay na gyud diay, ang maong pasyente. Kay nabati nako sa mga pulong sa mga awit nga gitugyan nila sa Diyos ang kalag sa maong pasyente.

Gibati kog tumang kahadlok. Kay di ko gustong mahiduol og usa ka patay. Nihana kog bangon. Apan di nako madaug akong lawas. Wa koy umoy. Ug nisakit akong toong kilid. Kay gibuslotan kini. Ug gipaagian og plastic nga tubo nga maoy mosuyop ug mohabwa sa plema nga niputos sa akong baga.

Ganihang alas siyete sa buntag ang takna sa pag-opera nako. Gidala ko dinhi sulod sa operating room sa Green Meadow Medical Center ning dakbayan. Sa wa pa ko operahi, gilingawlingaw ko ni Dr. June Lerio og daghang mga pangutana. Aron mawala akong nerbiyos. Bintaha kay paisano nako ang doctor. Kaila siyas akong mga paryente sa lungsod sa Alegria. Gipangumusta niya akong mga ig-agaw nga sila si Mario, Eric, Boyet ug Bambam.

"Piyong lang Ben kay halang ra ba ning kemikal nga among ipahanggap nimo," ni Dr. Lerio pagkamatikod niya nga na-relaks na ko pag-inistorya mahitungod sa akong mga ig-agaw. Nipiyong ko ug gihaklapan akong nawong og itom nga labakara. Sa usa lang ka pamilok, nakatulog dayon ko.

Sumala sa doctor, akong sakit pneumonia. Kinahanglan operahan dayon ko kay naputos na akong duha ka baga sa plema. Kay hapit na moabot ang higayon nga di na ko kaginhawa. Gikan pag-admit nako gahapon, karong buntaga gitakda dayon ang operasyon.

Komplikasyon kuno akong sakit sa dayabitis. Unsaon sa 32 pa lang akong edad nadayagnos na ko nga may dayabitis. Karon 52 na ko. Unya way tumartomar og tambal sa dayabitis. Nagsalig lang ko sa diet ug exercise. Apan kusog gihapon kong moinom. Way pili.

Apan naglabi ang beer. Mosukol gihapon kog binuntagay og inom. Wa ko maminaw sa tambag sa akong asawa’g mga anak. Maghilak usahay silang mobadlong nako nga maghinayhinay na sa inom.

"Ipangihi ra man ni!" maoy pirmi nakong tubag nga mabiaybiayon pa gyud sa nagtambag. Karon, niresulta na gyod ang abuso sa lawas.

Gibawian na kog mga libro sa mga kliyente nako. Kay daghan nang trabahong napasagdan nga wa nahuman. Usa ko ka CPA nga nag-opisina sa Banilad ning dakbayan. Akong kapikas nga si Alma mao say akong sekretarya. Nakahuman sab siya’g Accountancy. Among mga anak nga sila si Daisy ug Daphne, nag-eskuyla sab og Accountancy. Sila’y mga clerk/messenger namo.

Dihang may nurse nikuha sa akong blood pressure, nakahunahuna kog diskarte aron mahilayo sa akong gikahadlokan.

"Miss, puwede ba ibalik dayon ko sa akong private room sa fourth floor?" nako pa nga nikanga.

"Dili ra ba puede, Sir. Kay nitaas imong blood pressure!" sa nurse. Tungod tingali sa kasakit sa akong samad.

"May dayabitis ra ba ko miss. Gutom na kaayo kay sigi’g fasting. Nahadlok ko mo-down unya akong blood sugar" nako pa. Nagpanglingi ang nurse ug nidali og tawag og orderly. Gipahatud dayon ko sa akong private room.

Nakapahiyom ko nga nahilayo na sa akong gikahadlokan. Ug may natibook na sa akong hukom. Inig gawas nako sa ospital, maminaw na kos tambag sa akong asawa’g mga anak. (Kataposan)