Gula 50
Sa sala sa boarding house nga iyang gipuy-an gipakigsultihan ni Abigail si Harvey. Nagtuo siyang importante gyud ang tuyo sa ulitawo kaniya. Dugay-dugay na sab silang wala magkasultihanay.
“Wa ba ko makadisturbo nimo?” Nangutana si Harvey.
“Wa man,” tubag ni Abigail. “Nganong mianhi ka man sa akong gipuy-an?
“Nia ko tungod sa usa ka mahinungdanon kaayong tuyo.”
“U-unsa kana?”
“Dunay kamatuoran nga akong gitago nga angay mong masayran, Abigail.”
“H-ha?”
“Panahon na nga masayod ka sa tinuod. I love you, Abigail.”
“H-Harvey...?”
“Mao kana ang matuod. Gililong ko lang kini kanimo sulod sa dugay nang panahon tungod sa kaikog ug dako kong pagrespeto kanimo. Di ko gustong makaingon ka nga ni-take advantage ko sa atong friendship. Di sab ko gustong mausab ang imong pagtagad nako maong wa ko mangahas pagpadayag niini kanimo kaniadto. Apan karon...”
“Nabuang ka naman tingali, Harvey?”
“Nasayop ka, Abigail. Tinud-anay ning ako.”
“Ubos ra gyud tingali ang imong pagtan-aw sa akong pagka-babaye kay giyano-yano man lang ko nimo’g iningon ini?”
“Wa ka lang makasabot nako, Abigail.”
“Di gyud ko makasabot nimo kay lisod kang sabton. Imagine, human ko nimo tug-ani nga nagsabak si Krista sa bunga sa inyong relasyon, nangulitawo ka na hinuon nako? Unsay pagtuo mo nako, babayeng way buot? Babayeng way delicadeza?”
“Paminawa una ko, Abigail...”
“Husto na, Harvey! Ayaw na dugangi ang kabug-at sa akong kasingkasing. Ayaw ko patuoha nga mahigugma ka sa sama nako!”
Ug gibiyaan ni Abigail si Harvey didto sa sala. Misirit siya’g lakaw paingon sa sulod sa iyang lawak. Mihigda siya. Unya mihilak. Mibakho pag-ayo. Alang niya, dakong insulto sa iyang pagka-babaye ang gihimo ni Harvey. Nakamenos kini kaniya!
Pagkaugma, sulod sa school campus, nangitag higayon si Harvey nga magkasulti sila si Abigail. Apan gilikayan ni Abigail ang ulitawo. Nahiubos siya sa gibuhat ni Harvey kaniya.
Pagkagabii, namisita na sab si Harvey kang Abigail. -- Sumpayan pa