EDITORYAL - Nganong usbon man ang tuno?

Kanang mga singer nga pakantahon atol sa dagkong boxing events sama sa mga away ni Manny Pacquiao wala ba gyud masayod sa guidelines bahin sa pagkanta sa atong National Anthem?

Nakapangutana kita tungod kay sa daghang higayon mora’g “gibinuangan” lang nila ang pagkanta sa Pambansang Awit. Usbon nila ang tuno ug tempo subay sa ilang kaugalingong kagustuhan.

Gimando baya sa balaud nga sundon gayud ang pagkanta sa National Anthem sa gilatid nga guidelines apan wala kini sunda ug gani mora’g gituyo gayud nga gub-on, hiwihiwion ang tuno sa himno.

Atong sugyot: Ang tanang gustong mokanta sa National Anthem atol sa world boxing events ipaubos una sa audition ug pasabton sa kamahinungdanon sa maong awit.