Room for rent

Gula 44

Gitubag nako ang tawag ni Kenneth samtang naglingkod ko sa atubangan sa tokador ug nanarapo sa akong buhok gamit ang usa ka tualya.

“Ngano bang nanawag ka man?” Giingnan ko siya.

“Aron pahinumdoman ka?” Daling tubag ni Kenneth.

“Sa unsa?”

“Sa atong schedule ugma.”

“Wa ko malimot niana. Ayaw kabalaka. Motunga ko.”

“Giseguro ko lang ang pagpahinumdom nimo. Tingalig may hangover ka pa sa pag-celebrate ninyo ni Denver sa inyong wedding anniversary kagabii.

Human sa panagsulti namo ni Kenneth, gi-charge dayon nako ang akong cellphone kay nag-low battery na kini.

Nianang pagkahapon, sa pagpauli ni Denver gikan sa trabaho, nagkahimamat na gayod sila si Albert.

“May bag-o na man diay tang kauban dinhi sa balay?” Giingnan ko ni Denver dihang nanihapon na kami.

Nakasabot ko nga si Albert ang buot niyang ipasabot.

“Oo,” maoy akong tubag. “Kagahapon pa na siya niabot dinhi. Nalimot lang ko’g sulti nimo.”

“Taga diin man kuno kana siya?”

“Taga Negros.”

“Tua didto ang iyang pamilya?”

“Ang iyang mga ginikanan. Ulitawo pa si Albert.”

“Kun mao ayaw’g kompiyansa,” ni Denver pa nga nagpahiyom, nagpasabot nga dalang komedya ang iyang gisulti.    

“Tingalig magtuo siyang managsuon ta ug pangulitawhan ka niya.”

“Saba diha,” nako pa. “Gisultihan ko na si Albert nga minyo na ko. Gawas pa, wa na siya’y luna diri.”

Gipikpik ko ang akong dughan tungod gayod sa akong kasingkasing.

Ug gitibawas namo ni Denver ang pangaon.

Pagkaugma, misulod na sab mi si Kenneth sa mabugnaw’ng lawak sa motel. Nahimo na ming regular nga suki sa motel sa may reclamation area. Motsek-in mi labing menos kaduha sa usa ka semana.

Pagsulod namo sa kuwarto, gilayog dayon ko ni Kenneth. -- Sumpayan pa