Nakamata ko’g sayo tungod sa tawag ni Liza. Domingo niadtong adlawa. Nanghuyatid ko dayong sandig sa headboard sa akong kama. Nagpanglugod ko sa akong mga mata.
"Happy birthday, Lea."
"Thanks, Liz. Ikaw gyod ang unang naka-greet nako."
"Gusto kong ako gyod, Lea. Ug kay wa may klase karong adlawa, sa Jollibee ta maniudto. Ako ang bahala sa gasto."
"Sus, bangkahan pa gyod ko niya, uy!" Mikatawa ko. "Apan salamat daan, Liz."
"Natural. Best friend god tika. Gawas pa, bag-o pa sab kong nakadawat og money."
Tua sa Amerika manarbaho ang mga ginikanan ni Liza, ug bugtong siyang anak. Nagpuyo siya sa iyang apohan sa among dapit sa siyudad. Third year college na kami.
Tuod man, sa Jollibee Colon kami naniudto. Nabusog gyod ko sa kadaghang pagkaon nga giorder ni Liza.
"Makigpanuroy si Rey nako unyang gabii, Liza." Nagpahiyom kong mitan-aw sa akong best friend. Nakita ko nga mikisdom ang iyang nawong. Nasuko.
"Di ba giingnan na tika, Lea, nga likayi na si Rey? Tam-is kaayog dila ang mga lalaki. Binuangan ka lang niya."
Nahikatawa ko sa pagpangisog ni Liza. Concern gyod siya kaayo nako.
"Sus, lupig pa man nimo ang akong mga ginikanan? Di pa nako trato si Rey, uy. Nangulitawo lang siya nako."
"Samuk-samok lang nang mga lalaki, Lea. Maong wa gyod ko modawat og suitor. Wa koy panahon nila."
Gikan sa Jollibee, nakigpanan-aw si Liza kanako og sine. Misugot ko. Sa balcony kami nanglingkod. Nakapangiyugpos ko sa katugnaw.
"Salamat sa imong kaayo nako, ha, Liz."
"Okay lang, Lea. Espesyal nimo karong adlawa. Giduyogan tika sa imong kalipay."
Wa na ko motingog. Didto na ang akong konsentrasyon sa salida. "You Change My Life" ang among gitan-aw. Unya kalit kong naigking dihang giagbayan ko ni Liza. Iya kong gihagkan.
"U-Unsa god ni, Liza?"
Kalit kong natukmod si Liza. Wa gyod ko magdahom nga buhaton to niya kanako. Wa ko makapugong sa akong kaugalingon. Nataas ang akong tingog.
"Please try to understand me, Lea. I can't control myself anymore. I love you."
"What?" Gihilasan ko sa akong nadungog. "Mao diay nga di ka gustong makabaton kog boyfriend kay nakagusto ka diay nako. You're a lesbian!" Wa koy pananghid nga mibiya kang Liza. Naglagot gyod ko kaniya.
Naglikay na ko kang Liza. Gisugot ko na sab si Rey. Pagkasayod ni Liza nga hinigugma ko na si Rey, mibalhin siya’g tungha sa Manila kay duna man siya’y uyoan didto. Malipayon ako sa among relasyon ni Rey. Inanay nang nahanaw sa akong hunahuna si Liza sa pagpanglabay sa mga adlaw. Giisip ko na lang nga usa ka tiaw sa kapalaran ang pag-abot ni Liza sa akong kinabuhi. (Kataposan)