Ulipon sa gugma

Gula 46

Si Harvey gustong magpatabang kang Abigail aron malikayan niini si Krista. Nakugang si Abigail sa pabor nga gipangayo ni Harvey kaniya.

“Unsang klaseha sa tabang ang gusto mo nga akong buhaton?” Gipangutana ni Abigail si Harvey.

“Maghimo ta’g drama,” nagkanayon si Harvey. “Patuohon ta si Krista nga duna tay relasyon?”

“U-unsa?”

“Kini ray nahunahunaan kong paagi nga makalikay ko kang Krista.”

“Ug nagtuo ka nga mosalir nang paagiha?”

“A-Abigail...”

“That’s illogical, Harvey. Taphaw ra sab kaayo ang maong gimik aron motuo si Krista.”

Wala makatingog si Harvey.

“Nasayod kong gubot karon ang imong pangisip maong wa ka na makahunahuna kun unsay maayong buhaton, Harvey,” ni Abigail pa. “Pero sorry to disappoint you. Di ko makahimo sa gusto mong atong buhaton. Makonsensiya ko sanglit babaye sab ko sama kang Krista.”

Wala gihapon motingog si Harvey. Mipitokpitok lang ang mga mata niini nga daw naghinuktok sa gisulti ni Abigail.

“Abi ko ba’g di ka gustong magsamok si Krista nako,” ni Abigail pa. “Nganong karon gusto man ko nimong gamitong instrumento aron makalikay ka sa imong obligasyon ngadto kaniya. Bentaha unta kun wa pa siya magsabak sa bunga sa inyong relasyon, puyde tingaling himuon ta ang maong gimik. Pero sa iyang kahimtang karon, di ko makahimo sa binuang nga gusto mong buhaton. Mas maayo nga pakaslan mo gyud siya.”

Walay nahimo si Harvey sa pabor nga iyang gihangyo kang Abigail. Huyhoy ang mga abaga niini nga nanamilit ug mibiya sa gipuy-an sa dalaga. Daw nahisagmuyo kini pag-ayo sa pagbalibad ni Abigail.

“Mao nay gusto ni Harvey nga inyong buhaton?” Nakaingon si Vonna human sultihi ni Abigail sa tuyo ni Harvey kaniya.

“Oo,” tubag ni Abigail. “Pero nibalibad ko. Gawas nga di ko gustong masakitan si Krista, di sab ko makahimo paghatag og kinabuhi sa usa ka relasyon nga dili tinuod.”

“Kaanugon baya, uy, nga gibalibaran nimo si Harvey.”

“Nganong anugon man?”

“Mao na unta toy higayon nga makabawos ka ni Krista!” -- Sumpayan pa