Ulipon sa Gugma

Ang paghalok ni Abigail kang Michael maoy paghangop ug pagdasig niini alang sa bag-o niining kinabuhi human sa aksidente. Apan dili tinukmod sa maong gugma ang maong halok. Kay hangtod niining higayona, wala pa gayod siya mobatig paghigugma kang Michael.

“Hinaut nga ang maong kiss dili maoy una ug kataposan, Abigail,” nagkanayon si Michael nga daw tulugkaron og sinultihan.

Wala motingog si Abigail. Naluoy siya kang Michael. Apan kutob ra diha. Wala nay pagbati nga labaw pa niana. Gitudloan na niya ang iyang kaugalingon aron makakat-on sa paghigugma kang Michael apan nagpabiling manhid ang iyang kasingkasing. Naglagot na gani siya sa iyang kaugalingon kun nganong si Harvey pa gihapon ang iyang gihigugma.

Nagsingabot na ang Pasko. Nagplano si Abigail nga mobakasyon sa Villaba. Gimingaw na siya sa iyang mga ginikanan ug igsuon nga dugay nang wala niya makita tungod sa iyang pag-eskuyla sa Ormoc.

Human sa prelim exam sa second semester, nangandam na si Abigail sa iyang pagbakasyon ngadto sa ilang lungsod -- sa Villaba. Gipahibalo niya si Michael sa iyang planong pagbakasyon.

“Kanus-a ka mobalik?” Nangutana si Michael.

“Human sa Bag-ong Tuig,” laktod nga tubag ni Abigail.

“Pag-ayoayo.”

“Salamat.”

Nahinayon gyud ang pagbakasyon ni Abigail sa Villaba nianang ika-17 sa Disyembre. Nahinangop ang iyang mga ginikanan ug igsuon pagkakita kaniya. Gikahimamat usab niya ang iyang mga higala.

Samtang nagbakasyon si Abigail, nakahigayon siya sa pagpamalandong sa iyang pagpakigrelasyon kang Michael. Ug sa unang higayon, gibati siya’g kamingaw sa iyang boyfriend. Nagsugod na ba siya pagbati og gugma ngadto niini? Ambot lang. Wala siya makaseguro.

Ang naseguro lang niya mao nga mas bug-at pa gihapon si Harvey kay ni Michael sa iyang kasingkasing.

Malinawong nakalabay ang Bag-ong Tuig. Ug natapos ang pagbakasyon ni Abigail sa Villaba. Mibalik na si Abigail sa Ormoc. Ang una niyang gipahibalo sa iyang pagbalik sa siyudad mao si Michael.

Apan nakamatikod si Abigail nga ingon sa wala mahinangop si Michael sa iyang pagbalik sa Ormoc. Nahibulong si Abigail. -- Sumpayan pa