When I need you

Nalingaw ko nga nagtan-aw kang Benjo nga naningkamot pagbalanse sa paglakaw   aron di masukamod. Gisunod-sunod ko siya sa among lagwerta nga gibanigan og bermuda.

Usa ka tuig kapin pa lang si Benjo. Himsog siyang pagka bata. Guwapo, maayong pagkaliwat sa amahan. Kalit nga mikisdom ang akong nawong. Naglagot kong naghunahuna kang Noli, ang amahan ni Benjo.

"Layas! Gipaeskuyla ka namo apan nagbinuang ka!"

Naghilak kong mibiya sa among balay dihang gipalayas ako sa akong mga ginikanan pagkasayod nila nga mabdos ko. Nahimo kong boyfriend si Noli nga akong classmate sa kursong komersiyo. Gisalikway ko sa akong mga ginikanan.

Si Noli ang akong gidangpan. Apan labaw nga kasakit ang akong nahiagoman dihang miadto ko sa iyang boarding house nga gipuy-an.

"Di pa ko andam sa kaminyoon, Estela. Gusto pa kong makahuman sa akong pag-eskuyla."

"Di mo ba lang diay ko tabangan sa sitwasyon ko karon, Nol? Nagkinahanglan ko nimo. Ikaw ang amahan niining akong gimabdos." Naghilak ko sa atubangan sa akong boyfriend.

"I'm sorry, Estela."

Sa akong kalagot, gitamparos ko si Noli. Nagdanguyngoy kong mibiya kaniya. Naglibog ko kun asa ako mopaingon. Mahadlok sab kong moduol sa akong mga iyaan ug uyoan kay seguradong ila sab kong kasuk-an.

Kalit nga nahunahuna nako si Alex, ang lalaki nga nangulitawo nako sa dugay nang panahon. Apan si Noli ang akong gisugot. Apan nasayop diay ako. Nasayop ako sa lalaki nga akong gipili.

Nagpabaga ako sa nawong. Gihikling ko ang kaulaw. Miduol ako kang Alex nga bag-o lang nakahuman sa college ug aduna nay trabaho. Magulang nakog duha ka tuig si Alex.

"Unsay nahitabo, Estela?"

Nahibulong si Alex nga nagtan-aw nako nga naghilak. Diha kami sa guardhouse sa kompaniya nga iyang gitrabahoan mag-estoryahay. Gitug-an ko kaniya ang tanan.

"Ayaw kabalaka, Estela. Nia ako nga andam motabang nimo. Duha ang kuwarto sa apartment nga akong gipuy-an. Sa usa ka kuwarto ka matulog."

Nalipay ako sa pagsagop ni Alex nako. Taga Ormoc siya apan dinhi sa Cebu magtungha. Ug nia sab sa Cebu magtrabaho. Sama sab kang Noli, taga Mindanao apan sa Cebu nagtungha.

Nanglabay ang mga adlaw. Gipanganak ko si Benjo sa tabang ni Alex. Wa nay kasayoran si Noli sa pagkatawo sa iyang anak kay mipauli man siya sa Mindanao ug didto na tiwasa ang iyang pag-eskuyla. Naglikay siya sa iyang responsibilidad nako ug sa among anak.

Gipasaylo ako sa akong mga ginikanan. Mipauli ako sa amo. Ila kong gipatiwas sa pagpatungha. Ug karon, nakahuman na ko sa college ug aduna nay trabaho.

"Kumosta ka na, Estela?"

Misurok ang akong dugo sa kalagot pagkakita kang Noli. Gipasulod diay siya sa among katabang. Gidali ko pagkugos si Benjo.

"Nganong nia ka? Wa ka nay kahigayonan para nako. Diin ka sa panahon nga gikinahanglan tika?"

"Tagai kog laing higayon, Estela. Andam na ko sa pagminyo nato."

"Kabaga gyod nimog nawong, Noli. Hala, layas na! Minyo na ko kang Alex nga tinuod nga nagmahal nako."

Way tingog nga mitalikod si Noli nako. Ug wa madugay, nahiabot si Alex. Gisugat ko siya. (Kataposan)