Dahong laya

Nag-inusarang naglingkod si Noy Binog sa lantay'ng kawayan sa iyang payag, simpig sa bentana. Milahos ang iyang panan-aw ngadto sa halayong kasadpan. Inanay nga misalop na gayod ang haring adlaw. Nangagho siya.

Unya, giliwag niya ang iyang panan-aw ngadto sa dakong punoan sa kaymito nga nagtuybo diha sa natad sa iyang payag. Maoy nasugat sa iyang panan-aw ang usa ka dahong laya nga inanay'ng nagtulilik sa pagkatagak gikan sa sanga sa kaymito sa ibabaw ug mitugsad sa yuta sa natad.

Gipasarap niya ang iyang panan-aw sa natad ug miungot ang iyang mga mata sa daghang mga dahong laya nga nagpasad sa yuta. Mingaw nga palandungon! Ang mga layang dahon dili ug dili na gayud mobalik pa ngadto sa mga sanga sa kaymito. Kay inigkalaya sa mga dahon, inanay kini nga mapungil, matagak gikan sa mga sanga ug motugpa ngadto sa yuta.

Gibuhian na usab ni Noy Binog ang lain niyang lawom nga pangagho nga nagatutok gihapon sa mga dahong laya sa natad. Ingon usab niini ang kinabuhi sa tawo! Inigkatigulang sa tawo, mahisama usab kini sa dahong laya. Motaliwan. Mapulak ug motugsad balik paingon sa yuta. Nakapanglingo si Noy Binog. Ug nakita karon niya ang iyang kaugalingon diha sa mga dahong laya nga nagpasad sa yuta.

Otsenta anyos na si Noy Binog. Talagsaon nga pangedaron nga lahutay niyang naabot sa iyang kaugalingon karon. Apan lahi na sa iyang kabatan-on kanhi. Mokuto na ang iyangmga lutahan. May gipamatyag na siya. Anaa na kaniya ang agay-ay sa katigulangon. Nag-inusara siyang nagpuyo sa ibabaw sa bungtod, sa kabiling luna nga nasunod niya sa kanhi niyang mga ginikanan. Gibiyaan niya ang karaang balay sa patag. Nagpabilin siyang gulang nga ulitawo. Hingpit niyang gibiyaan ang kalihukang sosyo ug sibiko, ilabi na ang serbisyo-publiko sa mga molupyo sa ilang baryo. Inila siyang magtatambag ug manghihilot sa sityo Iba, Barangay Basak.

Kanhi, usa usab siya ka aktibong lay minister nga nag-alagad sa ilang parokya, sobra sa 50 ka tuig. Nagasangyaw siya sa Maayong Balita ug pulong sa Ginoo. Ug tungod sa iyang pagsentro sa iyang kinabuhi sa pagpangalagad sa Ginoo, hingpit niyang nahikalimtan ang pagminyo og usa ka babaye.

Bisan kun mibalhin na siya pagpuyo sa ibabaw sa bungtod, daghan gihapong baryohanon nga motungas sa iyang payag nga magpatambag kaniya ug magpahilot sa ilang mga piang. Alang kang Noy Binog, wa siyay pagmahay nga nagpabiling nag-inusara sa pagpuyo, ibabaw ning kalibutan.

"Ginoo ko! Sa tanang higayon, andam na ko nga moatubang kanimo! Sama sa dahong laya nga matagak sa punoan sa kahoy ug nagpasad sa yuta, nasayod kong hapit na usab moabot ang akong tagal ug hingpit kong mobiya ibabaw ning kalibutan nga wa nay pagbalik pa....!"

Laing pangagho ang gibuhian ni Noy Binog. Ning iyang pangedaron karon, malipayon siyang maghunahuna sa kabilin nga hingpit na niyang talikdan sa umaabot.

"Nasayod ko nga daghan na sila nga mosunod sa akong lakang! Daghan na sila nga padayong magsangyaw sa Maayong Balita! Daghan na sila nga nakakat-on sa akong gipaambit...!"

Nagpahiyom si Noy Binog nga mihangad sa kahitas-an. Unya, inanay siyang miduko ug gitutokan na usab niya ang mga dahong laya sa natad. (Kataposan)