Bugti sa lawasnong kahakog

Mag-alas dose na sa tungang gabii apan nagpadayon pa gihapon si Isko sa iyang pagbahisbahis sa mga karsada sa siyudad sa Lapulapu luwan sa taksi nga iya karong gidrayban. Kinahanglan nga mokita siya’g dako-dako aron mapalit niya ang mga tambal nga giresita sa doktor.

Nahilandig man god sa ospital ang kamanghoran niyang anak tungod sa sakit nga dengue ug nagkinahanglan siya karon og dakong kantidad alang niini. May diyes mil na siyang nahipos sa sulod sa iyang pitaka nga naglakip na sa kantidad nga iyang giutang sa tag-iya sa taksi nga iyang gimaneho apan kulang pa kini. Walay trabaho ang iyang asawa ug nagsalig lang usab kini sa iyang masapi sa pagdrayeb.

Mipreno si Isko ug mipahunong sa sakyanan dihang nakita niya ang usa ka babaye nga misinyas samtang nagbarog daplin sa karsada. Guwapa ug seksi kaayo ang maong babaye nga miangay sa gisul-ob niining mini-skirt nga ubos lamang og diyutay sa bugan ang gitas-on ug itom nga blouse nga mihaom sa mikurba niyang lawas. Mituyhakaw pag-ayo ang duha ka bungdo sa dughan sa babaye nga daw kaluha nga bulkan. Misulod dayon sa taksi ang babaye ug milingkod sa atubangang lingkoranan. Migilaw ang puti nga paa niini nga nadan-agan sa puwahon nga kahayag sa nag-inusarang bombilya sa sulod sa taksi.

"Asa tika ihatod, Miss?" Nagpanglad-ok si Isko sa iyang laway samtang nangutana.

"Bahala ka na kun asa ko nimo dad-a..." Sa babaye pa sa pinaluray nga tingog nga ingon og sa mihagit sa pagkalalake ni Isko, "A-ako diay si Elvie!"

"A-Ako sab si Isko...." Paila ni Isko nga mapahiyomon samtang mipasiplat sa miamag nga dughan ug paa sa babaye. Unya dihay kablit sa kahidlaw nga nabatyagan ni Isko nga maoy nakapalihok sa anaa sa iyang atubangan. "K-kun dad-on ko ikaw sa motel, mosugot ka ba?" Niya pa dayon hikap sa paa sa babaye.

Mipadagan dayon si Isko sa sakyanan dihang mitangdo si Elvie. Maoy iyang nahunahunaan ning higayona ang pagdala kang Elvie ngadto sa sikat nga motel nga nahimutang sa reklamasyon nga sakop sa dakbayan sa Sugbo.

Paghiabot nila sa motel misulod dayon sila sa lawak nga gitudlo kanila sa roomboy. Ug misamot pa gayod ang gibating gana ni Isko dihang nakita niya ang law-ay nga pasundayag sa telebisyon nga anaa sa sulod. Gigakos dayon niya si Elvie apan nasagang kini sa babaye. Ug milakaw si Elvie paingon sa banyo tapos mananghid kaniya nga maligo.

Migawas si Elvie sa banyo nga nagbitbit sa iyang mga sinina. Basa ang buhok niini ug nangalimyon pa sa kahumot. Misulirap dayon ang mga mata ni Isko ug mitubod ang iyang laway nga nakakita sa hubo nga lawas ni Elvie. Dihadiha miatake dayon si Isko nga niining higayona hingpit nang nalimot sa masakiton niyang anak.

"A-Ayaw una..." Ni Elvie pa nga nagkapuliki og lihay sa nagpungasi nga halok ni Isko. "Huboa una kanang karsones mog sinina ug ibutang diha sa ibabaw sa kama. Unya, kaligo didto sa banyo."

Tungod sa nag-alintabo nga kahinam ni Isko nga makadimdim na sa pagkababaye ni Elvie, miundang dayon siya sa pagkaligo ug migawas sa banyo nga nagpamahid pa sa tualya ngadto sa hubo niyang lawas. Unya, milurat ang iyang mga mata dihang wala na si Elvie sa lawak. Wala na usab niya makita ang biste niini nga naseguro niyang gisul-ob na sa naasoy'ng babaye. Gidali niyag punit ang iyang karsones nga diha na sa salog ug gikuot ang mga bulsa niini ug nasuta niyang wala na ang iyang pitaka. Bugtong yawe na lang sa taksi ang mikagay sa sulod sa iyang bulsa. Midali siya’g dagan paingon sa gawas kay niining higayona nahinumdoman na niya ang masakiton niyang anak nga nagkinahanglan unta sa nahanaw niyang salapi! (Kataposan)