Room for Rent

Ang hinungdan sa kamatayon ni Mario mao ang cardiac arrest. Dead on arrival siya pag-abot sa hospital nga gidad-an kaniya.

Sa kamatayon ni Mario, mora’g dunay higot sa akong liog nga nabugto. Kay sa tinuod lang,naproblema na ko’g maayo sa relasyon namo ni Mario. Lakip na ang relasyon namo ni Kenneth gikaproblema ko.

Malimtan ko lang ang maong suliran sa panahon nga magtagay mi sa lawasnong kalipay. Apan human sa pleasure, mobalik na sab pagsungog nako ang suliran. Nabalaka ko nga moabot gyud ang panahon nga madiskobrehan ni Denver nga nagluib ko sa among kaminyoon.

Mao nga sa hinanaling kamatayon ni Mario, mora’g miluagluag og diyotay ang akong gibating kabalaka. At least, si Kenneth na lang ang akong problemahon. Dili na kaayo complicated ang sitwasyon.

Sa laing bahin, gikalipay sab ni Kenneth ang kamatayon ni Mario tungod kay iya na kuno kong masolo.

Apan misamot ang ka-demanding ni Kenneth. Gusto niya nga gawas nga magtagbo mi sa naandan namong schedule sa adlaw’ng Biyernes, magkita sab mi sa adlaw’ng Miyerkules.

“Nasayod kong makalugar ka kun gusto gyud nimo,” ni Kenneth pa samtang nagsultihanay mi nga nagtupad sa paghigda sulod sa mabugnaw’ng lawak sa motel nga among giokupahan.

Bag-o pa ming nakahuman sa pagtagay sa lawasnong kalipay.

“Dili maayong kanunayon nato ang kinawat-kawat natong panagtagbo, Kenneth.” giingnan ko siya. “T'-tingalig...”

“Tingalig unsa?”

“Tingalig masakpan na hinuon ta kun kanunay tang magkita. Igo na ang kausa sa usa ka semana. Matag Biyernes.”

“Nakahimo ka man lagi niini kaniadto sa buhi pa si Mario. Di ba Miyerkules man ang inyong schedule nga magtagbo kaniadto?”

Wala na ko makatingog. Ug napugos ko pag-uyon sa gusto ni Kenneth.

Sukad niadto, matag Miyerkules ug Biyernes na kaming magkita si Kenneth ug manulod sa usa ka pribadong lugar aron magtagbaw sa panagtagay sa matam-is nga dugos sa kalipay nga lawasnon.

Sa akong paniid, mora’g wala pa gihapon makasabot si Denver nga naghugawhugaw ko sa among kaminyoon.-- Sumpayan pa