Room for rent

 Gula 31

Nakamatikod ko nga misamot ang pagkayabag ni Kenneth ngari nako samtang nagkadugay ang tinagoan namong relasyon. Dihay higayon sa among panag-abot sulod sa mabugnaw nga lawak sa motel nga human sa mainiton namong kombate sa kama, mipadayag siya nga gusto ko niyang solohon. Gusto niyang wala na siya’y kabahin sa akong panahon.

“Magtaban ta,” matud niya.

“U-unsa?” Nakugang ko sa iyang gisulti.

“Mangadto ta sa dapit nga dili na ta matultolan sa imong bana. Biyai siya ug kita nay magtipon.”

“Dili kana mahimo. May mga anak ming nahibilin didto sa Surigao.”

“Makahimo man tingali ang imong bana pagbuhi sa inyong mga anak bisan wala ka.”

“Daotan ko nga pagka-asawa. Pero di ko daotan nga inahan. Gimahal ko ang mga anak namo ni Denver.”

Maayo gani kay wala mamugos si Kenneth. Gisubli na lang hinuon namo ang pagpinarayganay. Gitagbaw gayod namo ang among kaugalingon pagtagamtam sa talagsaong kalalim sa panaghilawas.

Kun sexual life maoy hisgotan, buhong ko kanunay. Duha gud ka lalaki ang regular nga morabadang nako. Usahay, kun kondisyon si Denver nga akong bana, mo-score pa usab siya. Mao nga nasinati ko ang katagbawan sa akong sexual life-- uban nila ni Mario, Kenneth ug Denver.

Dihay higayon nga gikuyawan ko. Kapin na sa usa ka bulan nga wala ko tunghaa sa akong regla. Nabalaka ko nga tingalig nimabdos ko. Bisan tuod nga may bana ko nga matudlong amahan sa bata pero angay gihapon kong mabalaka kay tingalig dili moliwat kang Denver ang bata!

Maayo gani kay pagkasunod semana, mitungha ang akong regla. Misantop sa akong hunahuna nga gilayagan lang tingali ko.

Nagpadayon ang kinawat-kawat nga panagtagbo namo ni Mario. Nagpadayon sab ang hilom nga panag-abot namo ni Kenneth. Milahutay gyud ang salawayon nga pagpakigrelasyon nako ngadto nila ni Mario ug Kenneth.

Hangtod nga usa ka buntag niana, nabaniog sa dapit nga among gipuy-an ang kalit kaayong kamatayon ni Mario.

Nakugang ko sa maong kasayoran.