Ulipon sa gugma

Gula33

Nakabaton og diyotay’ng kalibog si Abigail. Ngano bang gusto man nga manuheto si Harvey sa iyang kinabuhi?

Managhigala tuod sila apan wala kana magpasabot nga i-open niya ngadto sa ulitawo ang tanang butang mahitungod sa iyang kinabuhi, labina gyud bahin sa pribadong aspeto. May limitasyon sila sa usag-usa.

“Tubaga ko, Abigail,” gikan ni Harvey. “Gisugot na ba nimo si Michael! Nagkatrato na ba kamo?”

“Wa pa,” laktod nga tubag ni Abigail. “Giobserbahan ko pa ang iyang mga lihok. Ngano man diay?”

“Tungod kay akong namatikdan nga misamot ang inyong kasuod karon.”

“Managhigala lang mi sa pagkakaron. Pero ayaw kabalaka, Harvey. Kun magkarelasyon man gayod kami si Michael, ikaw ang una nakong tug-anan.”

“A-ang buot mong ipasabot nga posibleng dawaton mo ang iyang gugma?”

“Depende. Kun magkasinabot mi.”

“Isip imong higala, pahimangnoan ko ikaw nga ayaw gyud pagkompiyansa kang Michael. Tingali’g gipasulod ka lang niya sa iyang laang. Tingalig igo ka lang niyang dula-dulaan ug pasakitan.”

“Daghang salamat sa imong pahimangno.”

Nahilom sila sa makadiyot. Unya gitipas ni Abigail sa lain tema ang ilang panagsulti.

“Komusta na man mo si Krista?” Gipangutana niya si Harvey.

“One click,” laktod nga tubag ni Harvey.

“Unsay one click?”

“Gipanguyaban ko na siya. Ug wa gyu’y daghang kuskos-balungos. Ni-yes dayon siya. Trato na mi.”

“Congratulations...”

Apan sa kahiladman ni Abigail, dihay nabatyagan niyang kurit sa kasakit. Oo, gisakitan siya sa kasayoran nga nauyab na ni Krista ang lalaki nga maoy tinuod niyang gihigugma.

Human sa panagsulti nila ni Harvey, si Abigail misulod sa rest room. Didto nanirado siya. Unya mihilak siya taman sa ginhawa. Gipagawas niya ang tanang naghuot sa iyang dughan. Mibakho siya’g maayo.

Paggawas niya sa banyo, nagkasugat sila si Krista ug Abigail. Buot untang molikay si Abigail apan gisangpit siya niini.

“Puyde bang makigsulti nimo?” Gikan ni Krista.

Nahiuknol si Abigail. -- Sumpayan pa