Unsa pa may kapuslanan ... Pasyo, nga dad-on mo ang imong selpon? ni Ulang pa nga nakamatikod sa iyang bana nga panagsa na lang moginhawa.
"Maayooooo .... naaa ... langggg ... naaa ... Ulangggg ... ngaaa ... saaa ... panahonnnnn ... ngaaaa ... akooo ... mingawonnnn ... kanimoooo ... akoooo ... maka-texttttt!" ni Pasyo pa nga nagputol-putol na ang sinultihan kay nagpinal.
Sa kadako sa yuta nga nasunod sa ginikanan ni Pasyo, hapit na kini mabaligya ni Ulang ang tanan. Kini gumikan sa galastohan sa pagkasakit sa iyang bana, nga wa mahibaw-i ang hinungdan sa mga mananambal.
"Aron dili kamo mosamot sa inyong galastohan ... ning pagkasakit sa imong bana, mas maayo nalang tingali nga adto na lang siya papahulaya sa inyong balay!" dihay gisugyot ni Dr. Dawilo Alkantar, ang medical director sa San Fernando Emergency Hospital.
"Basta sayang lang kaayo Pasyo nga magdala ka pa og selpon, nga sa akong tan-aw sa imong kahimtang karon, mao ra og dili kana magdugay?" giprangkahan na gayod ni Ulang ang iyang bana nga nagpinal.
May walo pa man lang god ka bulan, nga nanagtipon ang magtiayong Pasyo Ulang, sa ilang panagtipon isip magtiayon, ning ilang balangay sa Lacaron.
Naunsa ba hinuon nga sa miaging semana, samtang namisita nga mao rang usa si Pasyo, sa iyang dako nga kalubihan, kalit man kini natumba sa pag-abot sa ilang balay?
Dili man sad atake sa kasingkasing, kay normal man ang iyang dugo? Kini maoy nakapatukaw sa kaisipan ni Ulang.
"Adyossss .... naaa ..... langggg ..... Ulangggg!" kalit lang nahagtos ang nalungib nga paghanduraw ni Ulang, sa dihang nagkayuring ang tingog ni Pasyo, dayong piyong sa duha niya ka mata.
"Ayawww ... kabalakaaaa ... Pasyoooo .... ipadala .... koooo nimoooooo .... angggg .... imonggg ... selponnnnn!" sagol bakho ang tingog ni Ulang.
Adlaw kadto nga Sabado. Daghan nang mga silingan ni Ulang, aron mohatod sa lubong ni anhing Pasyo. Samtang haduol na unta sila sa sementeryo sa lungsod sa San Fernando, may kuriring nga tingog nga nabati ilawom sa lungon. Giablihan ang takob sa lungon ni anhing Pasyo ug dihay text messages nga nagkanayon:
"Basin baya mag-iring-iring ka ni Kumpare Bartolo!" (Kataposan)