Giuhaw si Epifania ungo

Matag Biyernes gyud sa gabii sila mag-date si Epifania. Ug alang kaniya ni Rodel si Epifania o Paning na tingali ang iyang dad-on sa altar sa kaminyoon. Dugay na silang managtrato ni Paning ug kun wala siya masayop mokapin na sa usa ka tuig ang ilang relasyon. Maanyag si Epifania ug may pagkahilumon kini.

Iyang nakaila si Epifania sa usa ka party diin giimbitar siya sa iyang klasmet nga si Dave. Ug didtong higayona sila magkahimamatay sa dalaga. Lubyok kaayo ang kandiis sa dalaga dihang gipaila-ila kini kaniya ni Dave. Ug sa una pa lang niyang pagkakita niini ingon sa mipitik dayon ang iyang kasingkasing sa usa ka hilom nga pagbati -- ug kini misangpot sa usa ka matahom kaayo nga relasyon.

“Taga dinhi ka sa siyudad, Epifania?” nangutana si Rodel sa dalaga.

“Dili. Taga isla ko. Nia lang ko dinhi sa siyudad kay nagtungha ko,” sa dalaga pa.

“Unsay imong gikuha nga kurso?” ni Rodel pa nga nagpakisayod gihapon.

“Computer Science,” daling tubag ni Epifania kinsa nalingaw sa pagsige’g tungab sa baso nga puno sa red wine. Ingon sa namuwa na pag-ayo ang nawong sa dalaga. Ug mao kadto ang una nilang panagkita nga misangko sa usa ka maanindot kaayo nga relasyon sa ilang duha ka kasingkasing.

Ug mao nga sa matag Biyernes gayod sa gabii sila mag-date kay maoy gusto ni Epifania. Manan-aw sila’g sine, mangaon sa usa ka mahalong restawran kay duna may trabaho si Rodel. Usa siya ka Engineer ug nagtrabaho siya sa usa ka sikat nga Engineering Construction Firm sa siyudad ug siya mao ang ilang Project Engineer. Tuod, may namatikdan si Rodel kang Epifania. Kay sa matag pangaon nila mo-order gyud kini og red wine ug kusog kaayo kining moinom ning matanga sa bino. Iyarok lang niini ang matag baso nga iyang ipisan. Apan wala lang hatagi’g gibug-aton ni Rodel kay duna man gyu’y hilig ang tawo, tingali hilig ni Epifania nga redwine ang iyang imnon.

Unya, usa ka gabii dihang nag-date sila ni Epifania ug dihang nangaon sila sa usa ka kan-anan, mi-order si Paning og red wine apan walay baligya ang maong restawran og red wine ug tungod niini kalit lang nga mibiya ang dalaga nga matud pa niini, mag-CR kuno kini’g kadiyot.

Gipaabot ni Rodel ang dalaga apan dugay kining nahibalik ug gibati’g kabalaka si Rodel. Unya paglabay sa duha ka oras nahibalik si Epifania. Mora’g gipaningot kini ug dihadiha nakita ni Rodel nga dihay pat-ak sa dugo dapit sa may kuwelyohan sa sinina niini.

“Sorry nga nadugay ko, Rodel, ha?” niini pa. “Naglain man gud ang akong tiyan...”

“Okey lang, uy, Paning,” ni Rodel pa nga mikupot sa kamot sa dalaga. Ug nanggawas sila sa restawran nianang gabhiona.

Nianang pagka-ugma nabasahan ni Rodel ang balita nga may usa ka waiter didto sa usa ka restawran sa siyudad nga gipatay. Ug segun sa imbestigasyon dunay duha ka samad nga morag agi og hait kaayong ngipon o bangkil ba kaha. Ug matud pa sa balita wala nay dugo ang tawo. Ug nakurat si Rodel kay didto kini mahitabo sa restawran nga ilang gikan-an ni Epifania. Didto gyud! Ug naglibog si Rodel bahin sa nasaksihan niya kang Epifania niadtong higayona didto sa restawran, kay may lama sa dugo ang kuwelyo niini.

Nianang pagka-Biyernes sa gabii miadto si Rodel sa boarding house ni Epifania apan nakugang siya sa iyang pag-abot kay dunay mga polis ug dihang iyang gipangutana mitubag ang usa ka polis nga may gibalbal sa ungo sa boarding house.

“Epifania ang ngalan sa gidudahan nilang ungo,” matud sa polis. Apan wala na si Epifania sa boarding house ug nakahilak si Rodel. (Kataposan)