Ulipon sa gugma

Gula 28

Mipahiyom si Harvey sa pagkakita niini kaniya. Wala na lang molahos si Abigail ngadto sa iyang kuwarto. Giatubang na lang niya ang ulitawo.

“Maayo kay nahiabot ka na,” ni Harvey pa. “Kaganina ra kong nagpaabot nimo. Nangaligo man kuno mo’g dagat?”

“Oo,” mubong tubag ni Abigail.“Kami ni Vonna.”

“Kamo rang duha?”

“H-ha! A-aw, ku-kuan...”

“Kuyog tingali ninyo si Michael, no?”

“Oo. Daghan mi. Kauban namo ang iyang mga klasmet sa PE.”

“Ingon na gyud diay niana ang inyong ka-close? Mora’g hugot na gyud tingali kaayo ang inyong bonding.”

Wala motubag si Abigail. Nangita siya’g paagi nga matipas ngadto sa laing tema ang panagsulti nila ni Harvey.

“Tuod,” ni Abigail pa. “Nganong nia ka man?”

“May mahinungdanon kong tuyo nimo,” tubag ni Harvey.

“U-unsa kana?”

“Gusto unta kong mananghid nimo.”

“Mananghid?” Mikunot ang agtang ni Abigail samtang mitutok kang Harvey nga seryoso kaayo ang panagway.

“Oo,” misamot ang kaligdong sa nawong ni Harvey. “Isip usa ka higala, gusto kong pangayoon ang imong opinyon bahin sa nakab-ot kong hukom.”

“Unsa nga hukom?”

“Nakahukom kong panguyaban na lang si Krista.”

Nakugang si Abigail sa iyang nadungog. Dili makapahimuot alang kaniya ang gisulti ni Harvey. Kalit lang mikulba ang iyang dughan.

“Puslan man nga naghimo-himo si Krista og estorya nga may relasyon na kami,” ni Harvey pa. “Mas maayo pag tinud-on ko na lang.”

“Anaa ra kana kanimo,” uban sa hilaw nga pahiyom ang gisulti ni Abigail. “K-kun maoy imong hukom, ipadayon ang imong nahunahunaan kung nagtuo ka nga makalipay kana kanimo.”

“Nga sa ato pa, mosugot ka nga pangulitawhan nako si Krista?”

“Harvey, di na kinahanglang mag-agad ka sa akong desisyon mahitungod nianang butanga. Di na kinahanglang mananghid ka pa nako. Personal mo na kanang kinabuhi. Di na ko angay manginlabot niana.”

“Pero ikaw ang hinungdan nganong pangulitawhan nako si Krista.”

Mikunot ang agtang ni Abigail. Naglibog siya sa iyang nadungog. -- Sumpayan pa