Pagmahay sa abusado

Alas nuybe sa buntag ang eskedyul nako sa CT Scan. Minus kinse para alas nuybe nia na ko sa atubangan sa pultahan nga may marka "CT SCAN". Nia ning opisinaha o klinika sa ikaduhang andana sa ospital. Ang ospital ginganlan og Green Meadow Medical Center sa dalan Tolentino ning dakbayan.

Nagsakay ko’g wheelchair gikan sa Room 480 sa ikaupat nga andana sa ospital. Gibilin lang ko sa orderly sa lobby kilid sa pultahan. Siya ang nagtulod sa wheelchair nga akong gisakyan.

Abli ang pultahan. Apan wa pa ko pasudla. May babaye nga nagsininag puti, nars tingali, nga nitan-aw lang nako. Unya nibalik siya’g duko sa iyang gibasa sa lamesa. Pagkataudtaud, niyahat siya.

"Ikaw Sir, ang pasyente nga si Cabigon? Glen Cabigon?" sa nars.

"O, ako," tubag nako. Nanglab-ok ko’g laway sa kakulba. Kay wa pa man gyud ko kasuway unsay buhaton sa pasyente ining CT Scan. Abi nako’g pasudlon na ko unya sugdan dayon ang pag-scan sa akong lawas.

"Huwat lang sa kadiyot Sir ha? Kay wa pa niabot ang mo-operate sa CT Scan. Wa pa sab niabot ang doctor nga mo-tsek-ap nimo kun wa ka bay allergy," sa babayeng nagputi. Niyango ko. Nahuwasan kadiyot sa kakulba.

Gikan sa akong pagkabata, wa gyud ko naadmit og ospital. Karon pa, nga 52 na akong edad. May duha na ka dagkong anak puro lalaki. Ug nangapo na ko.

Sa gamay pa ko, mahadlok ko’g indyiksiyon. Mosibat gyud ko sa eskuylahan kun dunay mga nars nga mangindyiksiyon. Karon, bisa’g asa na lang ko tosoka. Way hadlokhadlok. Unsaong naputos man akong baga sa plema. Na-pneumonia ko. Komplikasyon sa dayabitis.

Unya sa pag-X-ray sa akong baga, duna pa gyu’y dako kaayong spot. Morag coin nga singko pesos. Pagbasa ni Dr. Pilaso sa resulta sa akong X-ray, nirekomendar dayon siya nga ipa-CT Scan ko.

"Aron masuta nato kun kining imong spot, "mass" ba ni o dili. Kay kun mass ni, ipabiopsy na sad. Kun di ba cancerous," sa doctor dihang nibisita siya sa private room nako gahapon. Nangluspad, gipaningot ug nikurog ko’s gipamulong sa doctor. Way lain kong mabasol. Ako rang kaugalingon sa kaabusado sa lawas.

Trayenta pa akong edad, may dayabitis na ko. Apan wa gihapon nipatoo sa doctor. Wa ko nagmintin og tambal. Sige hinuong diet ug ehersisyo. Apan kusog gihapon kong moinom og bino ug soft drinks.

Niresulta na gyud. Giubo ko’g way putolputol. Gihilantan. Gitakigan. Hangtud naglisod ko’g ginhawa. Gipamalihog ko na lang si Alma akong kapikas nga patawgon sa akong opisina sa Abundio Corporation nga nag-sick leave una ko. Accountant man ko sa maong kompanya. Sulod sa bayente ka tuig, wa gyud ko kapalta bisag kausa.

"Mr. Cabigon, sulod na sir," sa babayeng gaputi. Tan-aw nako sa wall clock, alas diyes y media na. Gipatuyok ko ang mga ligid sa wheelchair aron mopanaw ko ngadto sa sulod. Wa pa man nabalik ang orderly nga tigtulod sa akong wheelchair.

Pagkahuman nako sa CT Scan, nakahukom ko nga magmatngon na gyud nga di na masakit og usab. Tiaw mong kun di lig-on ang pasyente, delikadong sa CT Scan pa lang, mamatay na. Sa wa pa gisulod akong lawas balig 15 minutos ilawom sa lingin nga aparatu, puti nga morag ligid sa traktora, gi-indyiksiyonan ko’g tambal. Ang maong tambal mopaklaro kuno sa akong internal organs para sa CT Scan. Ang epekto sa tambal nanginit akong lawas, nihalang ang mga kaugatan ug nikusog ang pinitik sa akong kasingkasing. Nuntan pa sa mandar sa nars sa pagpaginhawag lawom. Unya papugngan. Unya sublisubli pa gyud. Hapit ko atakeha's kasingkasing. (Kataposan)