Kanus-a may balud ang baybayon

Dili ka mahimong mosulod sa operating room, Ma'm! Sorry kaayo... sa nurse pa dihang giduol kini ni Maricel ug gihangyo. Wala nay nahimo pa si Maricel kundili ang pagpaagas sa iyang mga luha. Buot unta niyang sutaon ang kahimtang sa iyang anak nga tua sa sulod apan hugot gyod siyang gidid-an.

Unya may mga kamot nga migunit kaniya ug gidala siya sa taas nga lingkoranan nga gama sa kahoy ug gipalingkod. Nahimutang kini atbang gayod sa siradong pultahan sa operating room. Mitupad usab kaniya si Benjie nga iyang bana kinsa gihakop usab sa kabalaka.

Nagpanuigon pa lang og napulo ka tuig si Ivy. Bugtong siya lamang ang kalipay sa magtiayong Benjie ug Maricel. Ug dili madawat ni Maricel nga mawala si Ivy sa iyang kinabuhi kay ikamatay gyod niya kung mahitabo kini.

Nadasmagan ang iyang anak sa naghaguros nga awto samtang naglakaw kini pauli sa ilang balay kaganina. Apan ang salbahis nga drayber sa awto nga nakadasmag kang Ivy wala gayod motabang sa iyang biktima hinuon mibulhot kini’g padagan palayo sa dapit bisan pa man nga may daghang tawo nga nakakita.

Mga istambay na sa ilang dapit ang midala kay Ivy sa duol nga pribadong ospital samtang ang uban nilang mga silingan maoy mipahibalo kang Maricel sa nahitabo pinaagi sa telepono. Ug si Maricel na mismo maoy mipahibalo kang Benjie nga iyang bana. Nagtrabaho ang duruha sa managlahi nga kompaniya nga nagbase sa samang lugar.

"Wala pa nato makita ang bata, Dong, ug gikulbaan kaayo ko sa iyang kahimtang!" Padayon ang paghilak ni Maricel samtang namulong.

"Managsama ang atong gibati, Day, apan tumanon nato ang patakaran sa ospital. Magpaabot na lang ta nga mogawas ang doctor nga nag-opera sa bata." Giam-aman ni Benjie si Maricel, "mag-ampo lang kita sa labaw'ng makagagahom."

Human sa pipila ka gutlo sa ilang pagpaabot miabli ang pultahan sa operating room. Unya migawas ang mga tawo nga pulos nagsul-ob og puti. Ang ilang nawong may taptap nga puting panapton nga igong nakatabon sa ilang ilong ug baba. Mibarog dayon si Benjie ug Maricel ug miduol sa naasoy'ng mga tawo.

"Luwas na ang bata, Mar!" Usa ka tawo nga may taptap ang nawong ang misugat sa magtiayon. Dad-on na siya karong taudtaod sa recovery room."

"Salamat kaayo...." Miluag dihadiha ang naghuot nga dughan ni Maricel human mabati ang gisulti sa tawo. Apan dihay katingala nga kalit misikdo sa iyang hunahuna. Natingala siya kun nganong nakaila kaniya ang maong tawo nga didto na man unta kini sa sulod sa operating room dihang sila miabot ning ospital. Unya gitunol sa tawo ang tuo niining kamot kang Maricel ug lakip na kang Benjie ug naglamanohay sila.

"Ayaw kamog kabalaka bahin sa inyong bayranan ning pribadong ospital kay ako ang mobayad sa tanan. Ako na sab ang mogasto sa iyang pagtungha gikan karon!" Sa tawo pa dayong tangtang sa puting panapton nga nagtabon sa iyang nawong ug milakang palayo.

Gisaog sa hilabihang kalibog si Benjie tapos mabati ang mga pulong sa tawo. Samtang si Maricel usab mapahiyomon nga misud-ong sa mipalayo nga tawo kay niining higayona nailhan na niya kini. Siya si Dr. Rey Sunam-ang kanhi niyang uyab kinsa maoy matuod nga amahan ni Ivy! (Kataposan)