Ang abogado ug ang duwende

Samtang nangihi si Rudy sa CR sa ilang Emerson, may niguho nga ulo sa tumoy sa tubo. Sa walang eskina sa CR may tubo nga nagtuybo lapaw sa abaga ni Rudy. Abi ni Rudy og ulo sa tawo. Apan ulo diay sa gamay'ng tawo.

"Huh!" Nakugang siya. Naputol iyang pagpangihi. Nipahiyom niya ang ulo. Nangidhat.

"Atty. Rudy Gabucan. Banggiitang abogado. Apan pordoy!" sa duwende.

"Nganong nakaila ka nako?" ni Rudy nga nagsagol ang kalisang ug kahibulong.

"Way di namo mailhan basta among i-research. Labaw pas internet ni among gahum! He he he!" sa dwende. Mapasegarbohon.

"Unsa may imong tuyo nga imo man kong gi-research?" sa abogado nga nangluspad na ug gipaningot sa kakulba.

Di pa dugay ganihang alas diyes sa buntag ang pag-abot ni Rudy dinhi sa Panalipan, Catmon. Wa siya mag-awto. Nagsakay lang siya og bus. Nagyawat kay way ikagasolina sa awto. May sabut man gud sila. Nga kun mahuman ni Rudy og himo ang Memorandum para sa depensa ni Emerson sa kaso sa yuta, pabasahon ang kliyente, una isumiter sa husgado ang Memorandum. Nikumiter si Emerson nga mobayad siya’g diyes mil pesos sa maong papeles.

Gipadayon siya ni Emerson pagpindot niya sa doorbell sa gate sa balay daplin sa karsada. Nilingkod siya sa lingkuranan atbang sa sopa nga gilingkuran ni Emerson. Samtang nagbasa si Emerson sa Memorandum, gibati siya’g kaihion. Nangutana sa kliyente kun hain iyang CR. Nitudlo si Emerson sa CR sa gawas, sikit sa koral ug buyon sa gate.

"Nasayod ko nga kanang imong kliyente barat kaayo. Di ka kasapi ana. Karon, nagdahum ka nga makakobra ka’g diyes mil pesos. Ingna kong bakakon. Tagaan ka lang anag usa ka libo. Unya ipalutaw pa niya nga inutang na. Kwartahan na siya. Nangabot iyang mga anak gikas abroad sa niaging Pasko. Apan dili gyud gustong mobayad og insakto," sa duwende.

"Unsa may gusto nimong buhaton nako?" sa abogado.

"Biyae na imong kliyente. Kundi, surambawa. Adto pangayog kuwarta sa iyang kontra," sa duwende.

Niitom ang nawong. Nipula, nilalag, niputi.

Nipadayon si Rudy paghuman og pangihi.

"Diha sa ka kay ako sang balikon si Emerson," sa abogado.

"Balik niya diri kay may mahinungdanon kong tuyo nimo," sa dwende.

Paghibalik ni Rudy sa sala ni Emerson, mao gyu’y nahitabo sumala sa tagna sa dwende.

"Wa ra ba koy kuwarta ron. Nanganak akong anak. Tua sa hospital. Akoy naggasto. Gigamit gani ang pick-up. Maoy gisakyan. Wa man sab gud ka pahibawo nga moanhi ka," sa kliyente. Nikanga.

Nakapanglingo si Rudy sa kadismayo.

"Imo sab unta kong salbaron kay tapat god kong nilaban nimo," ni Rudy nga daw nagtibi.

"Manghulam lang una kos silingan og usa ka libo," ni Emerson dayong tindog.

"Kun mao na, unya ko na lang ni isumiter sa husgado kun kompleto na imong bayad," ni Rudy dayong gawas kay kaihion na sab siya.

Gaduhaduha siya kun mobalik ba’g pakig-istorya sa dwende. Apan wa may laing CR iyang natultolan.

"Unsa na? Di ba sakto akong tagna?" sa dwende. Nagpahiyom.

"Unsa man diay tuyo nimo nako?" ni Rudy.

"Nalooy ko nimo. Gusto kong tagaan tikag kadatu ug kaharuhay," sa dwende.

"Unsa may bugti?" ni Rudy.

"Surambawa imong nga kliyente. Ayaw na pagbasa og Bibliya. Daubi tanan nimong Bibliya," sa dwende. Nikunot ang agtang ni Rudy.

"Kun di ko mosugot, unsay mahitabo?" ni Rudy.

"Maut-ot ka. Di ka kasapi sa imong mga kliyente. Igo lang silang mangunsulta nimo. Di gani mobayad og consultation fee. Ang tanang kliyenteng moduol nimo, gusto lang palibre. Kun bungatan nimo’g acceptance fee, di na mamalik," sa dwende. Nakaamgo si Rudy nga abin diay ni Satanas ning dwendeha.

Dangtag usa ka tuig, ang bupete ni Rudy sa Canduman, Mandaue nga morag simbahan kadak-a wa nay karatula sa iyang ngan. Sa ibabaw sa pultahan nga dako, mabasa ang "TRUE FOLLOWERS OF JESUS MINISTRY".

Wa na manglaban si Rudy. Nagsangyaw na. Ulitawo man siya. Ug sa bata pa, gustong magpari. Apan gidiskurahe sa mga ginikanan. Gihimo niyang simbahan iyang bupete. Si Emerson ug tanan niyang nga kliyente nagpabunyag sa iyang tinohoan. Ug dagko kaayog hinatagan og tithes. Ang tubo sa CR ni Emerson, gibulit niya og semento. Ug gihimuan niya’g estante sa sulod nga gipatungan og Bibliya. (Kataposan)