Gula 10
Subling giangkon ni Mario ang akong pagkababaye. Gitahan ko sa dakong kasayon ngadto kaniya ang akong lawas. Mora ko’g karnero nga gitaral ngadto sa ihawan, wala motukol sa gibuhat ni Mario.
Samtang gitambayayongan namo ni Mario ang pagkatkat sa hagdanan paingon sa ikapitong langit, may mga higayon nga molakdop sa akong hunahuna si Denver. Apan gipugos ko ang pagtapdas kaniya gikan sa akong hunahuna. Gusto kong maka-concentrate sa gibuhat namo ni Mario.
Dili gayod nako kapugngan ang pagpahungaw sa maong reaksiyon tungod sa naghingapin nga sensasyon nga mihakop sa akong galamhan. Wala hinuon ko mabalaka nga may laing makadungog sa akong pag-agumod sanglit sirado man kaayo ang kuwarto nga among nahimutangan diin mao ray mitugaw sa milunop nga kamingaw ang andar sa aircon.
Mora’g dili siya gustong matapos dayon ang ikaduhang hugna sa maong pagtagay sa gidili nga kalipay maong gikontrol niya ang iyang kaugalingon.
Nakaseguro kong wala pa siya makahuman. Sanglit may kasinatian na ako sa kama, makaila ko sa lalaki.
Nagkadungan mi’g sangko sa kinapungkayan sa himaya sa ikapitong langit. Natagbaw ko sa among sesyon. Mora’g nahisaylo ko sa cloud nine sa akong paminaw sa kaugalingon. Usa ka lalim nga kasinatian.
“Gusto lang kong masayod, Phoebe,” nagkanayon si Mario sa dihang nakita niyang mibangon ko ug nag-ilis.
“Bahin sa unsa?” Gipangutana ko siya.
“Kun kini na ba gyud ang una ug kataposan natong intimate moments.”
“Ambot lang.”
Human ko makailis, mibangon na sab si Mario gikan sa kama. Pero dili na ako makapaabot niya aron magdungan mi’g gawas sa motel.
“Mouna na ko nimo’g gawas,” nananghid ko.
“Sige,” sanong ni Mario.
Migawas ko sa motel ug nagpahatod og taxi paingon sa Mabolo. Pag-abot nako sa balay, maoy una kong namatikdan nga daw nagmug-ot ang nawong ni Denver. -- Sumpayan pa