Ang lungon tunga sa karsada

Nisiaw na usab ang mga sipat kong mga ig-agaw. Kadlawong dako daw mga sigbin kining nanagtuwadtuwad og kinatawa nga nahimuot pag-ayo tungod sa ilang gibuhat rong gabhiona. Gikan silang agaw Jigger, Z-tard, Pinjun, Binad ug Malki nga nitambong og disko sa pikas baryo.

Ug sa ilang pagpamauli maoy na-tripingan ang nag-inusara nga lungon nga naka-display sa punerarya sa among lungsod. Walay nagbantay sa maong punerarya, busa yano ra kining gisulod sa mga hanggaw ug gikuha ang lungon.

Bisan gamay wala gyud silag mibatig kahadlok nga nagyayong sa lungon. Didto kini nila gidala ug gibutang sa awaaw'ng dapit tunga sa karsada. Maoy tuyo sa mga hanggaw ang paghadlok sa mga tawo nga mangagi sa maong dapit.

Grabing nakabaik-ik nilag kinatawa nga nagsud-ong sa matag reaksyon sa mga tawo nga moagi sa karsada nga gibabagan nilag lungon. May nagpanyagit sa kahadlok ug may nagkapandol-pandol og dinagan tungod sa kalisang.

Hasta si Noy Tony, ang drayber sa nag-inusarang bus sa among lungsod. Sa kalisang hapit nalang niya paluparon ang bus nga pinaatras ang dagan palayo.

"Hala...bulhot Ton ... kay nay ... lungon ... ha...! ha....! ha...!" sa mga hinampak kong mga ig-agaw nga grabing nakabuhakhak og kinatawa nga nag kantyaw ni Noy Tony. Grabing kalisang ang ilang gihatag niadtong gabhiona ngadto sa mga tawo. Wala na gyud siguroy makatupong sa kabuang ning akong mga ig-agaw kay ultimong lungon giapil pa man sa ilang kabuang.

Pagka taod-taod may nag hawong nga motor. Mahinamon silang nagpaabot kun unsay dangatan sa sakay sa motor kun makakita na unya sa gibagbag nilang lungon. Pagkatungod sa motor sa maong lungon, sa kalisang sa driver, dali kining nakalubag sa gasolinador aron sa pagpabulhot og padagan palayo sa maong lungon.

Apan sa kakusog sa dagan sa motor nag ikis-ikis ug didto mipaingon sa poste sa kuryente. Maayong pagkabangga sa motor sa dakong poste ug maayong pagkabunal sa ulo sa maong driver ug dihadiha nikirig kini.

Gipanguyawan ang akong mga ig-agaw. May kahadlok nga ni-uliot sa ilang galamhan. Wala sila magdahom nga mao kadtoy mahitabo. Gusto unta silang mosibat sa maong dapit apan nagpasuwabi ang konsensiya nga ilang gibati.

Dali nilang giduol aron susihon ang sakay sa motor kun buhi pa ba kini. Ug sa ilang pagsusi, daling naniga ang mga mata sa akong mga ig-agaw. Igo nalang silang nahingangha sa dihang nahibaw-an nila kun kinsay sakay sa maong motor. Igo nalang silang nagtinutokay.

Way tingog nga nanggawas sa ilang mga baba apan may mga pagbasol nga nilugmaw sa ilang panagway. Gibati nila ang dakong kalooy sa gidangatan sa sakay sa maong motor nga mao ang among uyoan nga si Tiyo Musong nga mangadlawon unta sa merkado aron sa pag-asikaso sa negosyo nilang isda. Grabe kadako ang pagbasol sa akong mga ig-agaw apan uwahi na ang tanan kay namatay gyud si Tiyo Musong tungod sa ilang kabuang. (Kataposan)