Ulipon sa Gugma (7)

Hait og tinutokan si Krista kang Abigail. Natugkad sa dalaga nga wala kini mahimuot nga nakigsulti si Harvey kaniya.

Dihang nagkatagbo ang ilang mga mata, misukol siya sa pagpakigtinutokay kang Krista. Alang niya, dili siya angay mahadlok kang Krista kay wala man siya’y sala nga nahimo ngadto niini.

Si Krista ang unang milunga sa pagpakigtinutokay kaniya.

“Tana, Harvey,” giagda ni Krista ang ulitawo. “Mamalik na ta sa library.”

“Sige, Gail,” ni Harvey pa ngadto kang Abigail. “Magsulti lang ta sa sunod higayon, ha.”

Wala motingog si Abigail.

May isulti pa unta tingali si Harvey kaniya apan gibitad na kini ni Krista paingon sa gawas sa canteen.

Flirt gyud! Nakatuaw si Abigail sa hilom.

Pagkagabii, didto sa boarding house ni Abigail, samtang naghigda siya sa iyang deck human sa panihapon, may nanuktok sa pultahan sa iyang lawak.

Mibangon siya ug giablihan ang pultahan aron pagsusi kun kinsa ang didto sa gawas. Si Vonna ang iyang nakita nga nagbarog gawas sa pultahan.

“May bisita ka,” taho ni Vonna ngadto kaniya.

“K-kinsa?” Nakapangutana si Abigail kay wala man siya’y gipaabot nga bisita.

“Si Michael,” mubong tubag ni Vonna.

Dugay-dugay nang nangulitawo si Michael kang Abigail. Klasmet sab niya kini sa kolehiyo. Bohemyo ug bolero. Nagsalig tingali kay guwapo. Pero wala hatagi’g gibug-aton ni Abigail ang pagpangulitawo ni Michael kaniya. Nasayod siyang dili kini maayo’g reputasyon sa ilang tulonghaan.

Palikero si Michael. Bisan kinsa lang nga babaye ang gikarelasyon niini. Tungod lagi kay guwapo, kadali ra kining makakubit og babaye. Pero turn-off si Abigail kang Michael. May looks tuod kini, pero wala man pud kini brains. Wala sab siya’y pagsalig niini.

“Ingna siya, Day,” ni Abigail pa ngadto kang Vonna, “nga natulog na ko.” -- Sumpayan pa