Ulipon sa Gugma (6)

Ingon sa misayaw sa kalipay ang kasingkasing ni Abigail sa iyang nadungog gikan kang Harvey. Flattered siya sa gisulti niini. Tiaw ba nga gihatagan man diay siya’g bili sa lalaki nga iyang gimahal sa hilom? Kinsa bang babayhana ang dili malipay niini?

Apan wala siya magpasabot kang Harvey nga nalipay siya sa gisulti niini. Labaw sa tanan, dili siya gustong ma-misinterpret niya ang gisulti ni Harvey. Nindot unta kun ang kaugalingon niyang interpretasyon maoy tinuod nga kahulogan sa gisulti ni Harvey kaniya. Pero nasayod siyang lahi ang buot ipasabot ni Harvey.

Nasayod siyang kutob lang sa higala ang pag-ila ni Harvey kaniya. Nasayod siyang dili na molabaw sa friendship ang pagtagad ni Harvey kaniya. Kutob lang sa pagka higala ang iyang papel sa kinabuhi ni Harvey.

“Salamat sa paghatag mo’g bili nako, Harvey,” nagkanayon si Abigail. “Nalipay ko niini bisan dili ko angayan.”

“Ngano bang nakasulti ka man og ingon niana?” Gikan ni Harvey.

“Tungod kay ako ra tingali ang imong higala nga wala mahitalay sa taas nga hut-ong sa katilingban ang kahimtang.”

“Ayaw paghunahuna’g ingon niana. Sa gikaingon ko na, wa ko magpili og higala. Ug ikaw, maoy hunahunaa kanunay nga importante kaayo ka alang nako labaw sa uban kong mga higala. You’re my special friend.”

Motubag pa unta si Abigail sa gisulti ni Harvey pero walay mga pulong nga nanglugwa sa iyang baba dihang nakita niya si Krista nga misulod sa canteen. Kalit lang gikulbaan si Abigail dihang miduol si Krista sa nahimutangan nila ni Harvey.

“Nia ka ra man diay dinhi, Harvey,” nagkanayon si Krista.

“Ingon ka nga mag-CR ka lang,” ni Krista pa ngadto kang Harvey. “Wa ka na man lagi mobalik didto sa library. Nabawo ko’g paabot nimo didto. Dihang gipul-an na ko, migawas na lang ko sa library. Gigutom ko maong mianhi ko sa canteen. Wa ko magdahom nga nia ka ra diay sab dinhi.”

“Pasensiya ka na, Krista,” ni Harvey pa. “Gigutom na sab ko maong paggawas nako sa CR, milahos na lang ko dinhi sa canteen.”

“Wa na lang gyud ka mobalik sa library aron pagpahibawo nako ug magkuyog na lang unta ta dinhi,” ni Krista.

“Sorry gyud kaayo,” ni Harvey.

Namatikdan ni Abigail nga gitutokan siya ni Krista. -- Sumpayan pa