Miduol si Harvey sa nahimutangan ni Abigail. Wala na lang siya mopakita’g attempt sa paglikay niini. Dili siya gustong makasabot ang ulitawo nga gusto niya kining likayan.
“Nia ka ra man diay dinhi?” Gikan ni Harvey nga milingkod sa bakanteng silya atbang sa iyang gilingkoran. “Abi ko ba’g niadto ka sa office sa atong dean?”
“D-didto na bitaw ko gikan,” namakak siya.
“Kadali gud?”
“Wa man didto si Mrs. Diaz (ang dean).”
“Mao ba?”
“Mao kana, Harvey.”
Ug gitiwas niya’g inom ang ice tea sa baso nga iyang gigunitan. Pagkahuman, mibarog na siya ug nananghid kang Harvey nga mogawas na siya sa canteen. Apan gigunitan ni Harvey ang iyang kamot.
“Balik una'g lingkod,” ni Harvey pa. “Gusto kong magkasulti ta’g maayo karon.”
“A-ang akong kamot,” niya pa. “Buhii palihog. Please lang.”
Gibuhian ni Harvey ang iyang kamot. Mibalik siya’g lingkod.
“U-unsay buot mong atong panagsultihan?” Gipangutana ni Abigail ang ulitawo.
“Gusto lang kong masayod sa hinungdan, Abigail,” ni Harvey pa.
“Sa unsa?”
“Kun nganong ingon sa gusto ka nang molikay nako?”
“U-unsa?”
“Nakamatikod kong mora’g di ka na gustong makigsuod nako. Nahibu’ng ko niini, Abigail. I don’t want to lose our friendship. Ikaw baya ang una nakong nahigala sa first day nako sa college gawas sa karaan na nakong mga amigo.”
Wala motingog si Abigail. Nahinumdom na hinuon siya sa unang adlaw nila sa kolehiyo. Sa iyang klase sa first subject niya sa buntag, si Harvey ang gikatupad niya’g lingkoranan. Nag-ila-ila sila. Ug kadto nay sinugdanan sa ilang panagsuod.
“Nganong gusto ka na man nga molikay nako karon, Abigail?” Pangutana ni Harvey.
Naglisod pagtubag si Abigail. -- Sumpayan pa