Ulipon sa gugma

Gula 3

Pagsulod ni Abigail sa canteen, mi-order dayon siya’g ice tea. Unya mipahimutang siya’g lingkod atubangan sa bakanteng lamesa.

Samtang nagpunay og suyop sa ice tea pinaagi sa straw, si Harvey ang iyang gihunahuna.

Gusto siyang molikay kang Harvey aron dili na molipang ang gibati niyang paghigugma ngadto niini. Aduna siya’y daghang mga katarongan kun ngano nga alang kaniya dili sila angay sa usag-usa.

Gawas nga pobre siya’g kaliwat ug adunahan ang pamilya ni Harvey, dili gyud sila pareson kun ang ilang outward appearance maoy basehan. Ambongan si Harvey. Kun kalitan siya’g tan-aw, susama siya’g panagway ni Justine Timberlake, ang ex-boyfriend ni Britney Spears.

Samtang si Abigail, walay panagway nga takos ikapasigarbo. Dili siya guwapa. Dili man sab hinuon siya maoy labing laksot sa tanang kaliwat ni Eva apan dili gyud siya matahom kun itandi sa ubang mga babaye nga nagbaton og maanyag nga panagway. Usa man gani kini sa gituohan niyang hinungdan nga wala pa gyud siya makauyab bisan 19 anyos na siya.

Taga Villaba si Abigail. Alang kaniya, unfair usahay ang kinabuhi. Kay dihay higayon human sa iyang paggradwar sa high school sa edad nga 18 (dugay siyang nakatapos tungod sa kawad-on), misulay siya’g panimpalad sa Ormoc sa tinguha nga makatabang sa iyang mga ginikanan nga nagkalisod-lisod ang kahimtang.

Pero kanunay siyang mountol sa iyang pagpangaplay og trabaho sa nagkadaiyang mga tindahan, opisina ug mga establisamento. Kanunay siyang mahagbong sa requirement nga “with pleasing personality” sa mga kompaniya nga iyang giaplayan.

Giangkon niya sa iyang kaugalingon nga dili siya ingon kamadanihon sa ubang mga babaye. May nagsulti hinuon niya nga sexy siya. Bisan wala siya’y looks pero duna man sab siya’y brains. Pero wala siya mobelib sa maong komplimento. Alang niya, bulatik lang kini. Mao nga bisan dihay nanguyab niya kaniadto, wala pa gyud siya’y boyfriend. Wala siya’y belib sa mga lalaking nanguyab niya. Nagtuo siyang gusto lang silang magduladula kaniya.

Taudtaod na si Abigail nga namalandong sulod sa canteen. Unya kalit lang siyang gikulbaan dihang nakita niya si Harvey nga misulod sab sa canteen. Mipahiyom kini pagkakita kaniya. -- Sumpayan pa