Sukli sa utang

Ingon sa nahigalam si Celso nga nakatilaw sa kalalim sa akong pagka babaye. Pagkasunod gabii, kalit lang siyang mibutho sa akong gipuy-an. Gitayming lang niya nga nahinanok na ang akong mga silingan sa iyang pagsulod sa balay agi sa pultahan sa may kusina.

Sulod sa kuwarto, mainiton namong gisaw-an ang kalalim sa panaghilawas. Daw miutong ang mga gutlo samtang among gisaulog ang bulohaton nga maoy maghatag og katagbawan sa tagsatagsa namo ka lawasnong panginahanglan. Gitagbaw namo ang among kauhaw sa himaya pinaagi sa pagtiti sa mga gutlo nga kami naglambang sulod sa kuwarto.

Ang gibuhat namo ni Celso nasubli sa makadaghan sa misunod nga mga adlaw. Dili kay si Celso ray nahigalam human nakatilaw sa akong kalami. Hasta sab ko nahigalam nga nakatilaw sa binolitasan.

Nakombinser ko sa hingpit nga nabuang gyud si Celso sa akong katahom kay namatikdan man nako nga ingon sa diri na lang gyud nako nagtuyok ang iyang kalibotan. Mora’g ako na lang gyud ang nasulod sa iyang hunahuna kanunay. Hapit tanang gabii siyang mosulod sa balay. May mga higayon gani nga magsagunson ang mga gabii nga mosulod siya sa akong gipuy-an aron makigsawo nako sa pagtagay sa lawasnong kalipay.

Usa niana ka adlaw, may mga polis nga misum-ok sa among dapit. May gipangita diay silang puganti. Usa ka lalaki nga nakalayas gikan sa bilanggoan ug segon sa report nga ilang nadawat, nagtago-tago ang maong kriminal sa kalasangan sa lungsod sa Mabini. Sanglit may kalasangan man sab sa Tambo, naabot ang kapolisan pagpangita sa puganti sa among dapit.

Bisan nabaniog na pag-ayo sa Tambo ang mahitungod sa puganti nga gipangita sa kapolisan, si Celso ingon sa wala mahadlok nga masugatan niya ang maong kriminal sa iyang paglakaw panahon sa kagabhion. Mosulod gihapon siya sa balay halos matag gabii. Magtagbaw mi’g maayo sa among panaghilawas. Kaadlawon na siyang mobiya sa akong gipuy-an.

Hangtod nga usa ka buntag niana, morag naukay ang akong mga silingan nga mga kabanay ra sab ni Ferdinand nga akong bana. Ang bana ni Grace nga manghod ni Ferdinand nakakita kunog tawo nga nagbarogbarog sa may karsada tungod sa ilang balay sa nakalabay nga gabii.

“Angay tang magbantay,” nagkanayon si Godo, ig-agaw ni Ferdinand. “Nia gyud diay magtago-tago ang puganti sa atong dapit.”

Tungod sa maong balita nga kadali rang mikaylap sa tibuok Tambo, daghan ang nangahadlok ug nabalaka. -- Sumpayan pa