Kilometro 35

Gula 95

Si Keith ang nagbarog sa akong luyo ug nakita kong mihinay nag paduol kanako. Nakugang ko pagkakita kaniya kay wala man ko magdahom nga moanhi usab siya sa sam-ang. May dala siyang mga bulak ug kandela.

“Nganong nia ka man?” Gipangutana ko siya. “May duawon ka?”

“Oo,” maoy iyang tubag. “Si Orville sab ang akong duawon. Managkot ko sa iyang lubong. Ug mananghid sab ko niya.”

“Nga unsa?”

“Nga unta di siya masuko kun magpakasal ta.”

Wala ko makatingog. Daw natuk-an ko sa pasumbingay ni Keith.

Milabay ang tulo ka bulan. Mibagting ang lingganay sa simbahan sa kinapusoran sa siyudad sa Obic. Mihugop ang daghang mga tawo aron pagsaksi sa kasal namo ni Keith. Adlaw kadtong Huwebes.

Bisan sa akong pagka-rape victim apan akong natugkad ang kamatinud-anon sa gugmang gihalad ni Keith kanako. Dili lisod higugmaon si Keith tungod sa iyang kabuotan. Kadali ra kong nakakat-on sa paghigugma niya ug nagkasabot dayon kaming magpakasal.

Sa unang gabii human sa among kasal, mas mainiton ang among pagtagay sa lawasnong kalipay. Niining tungora, gugma na ang nagtukmod sa among panaghilawas. Ug among namatud-an nga “the best sex takes place when love is at its best.”

Malipayon ko sa kaminyoon namo ni Keith.

Paglabay sa pipila ka bulan, nagsabak na ko sa unang bunga sa among kaminyoon. Excited kaayo ming makakita sa among liwat.

Usa ka higayon niana, namista mi sa lungsod sa Masulog. May iyaan man si Keith nga nagpuyo sa maong dapit. Nakalabay mi sa Kilometro 35 samtang nagsakay mig bus paingon sa maong lungsod. Sa among pagsaylo, igo na lang kong milingi niini isip kabahin sa akong kagahapon. -- Kataposan