Ang imbitasyon ni Pablo

Alas tres na pasado sa hapon. Bag-o pa nanira ang Archipelago Bank. Nag-check sa financial report ang manager niini nga si Mr. Crisanto Enriquez, dihang giduol kini ni Pablo ang janitor sa maong bangko nga bag-o pa nakahuman og pangpanlimpiyo. Nagkupot pa kini sa vacuum cleaner.

"Sir Cris, imbitahon unta nako mo ug panihapon sa balay karong Sabado. Maayo unta kun makalugar ka Sir," ni Pablo pa nga medyo nag-ukon ukon.

"Tayming kaayo Pablo, wala koy lakaw inig Sabado, makalugar ko og adto," tubag ni Mr. Enriquez nga medyo nabag-ohan kay sulod na sa napulo ka tuig kapin, karon pa nahitabo nga nangimbitar si Pablo sa ilahang balay.

Dili lang si Mr. Enriquez ang nabag-ohan kun dili hasta usab ang iyang mga staff sa bangko.

"Magpaboto ta og kuwitis kay milagro nga nangimbitar si Pablo sa ilaha!!" pasiaw ni Rico nga may dala nga bugalbugal.

Mao man gud ang naandan sa ilang opisina nga kun dunay okasyon, birthday, fiesta ug unsa man, tagsa ra ang sipyat nga walay imbitasyon. Gikalipay kini ni Mr. Enriquez aron magkasuod og maayo ang usa’g usa kay importante baya kaayo ang teamwork sa usa ka kompaniya. Gani pulospulos niya linudhan sa kasal ang iyang mga sakop.

Adlaw nga Sabado. Dili kaayo maayo ang buot ni Mr. Enriquez kay dili makalugar og kuyog ang iyang kapikas nga si Carol. Mao ang gipalabi niini ang iyang mga barkada. Aduna silay mahjong session. Kini mao ang pirmi nga awayan nila nga magtiayon, ang pagkahilig ni Carol sa sosyalan. Kulang kaayo kini og panahon sa ilang pamilya, ilabi na sa ilang duha ka mga anak, sila si Jerico ug Erika.

Dali ra nadumduman ni Mr. Enriquez ang balay ni Pablo, pinaagi sa sketch nga gihatag niini. Atbang kini sa Cirilo's Refilling Station sa may sitio Bakilid, Mandaue City. Dos andanas ang maong balay, karaan na pero lig-on pa tan-awon. Iyang gi-parking ang iyang sakyanan sa duol niini.

Pagsulod ni Mr. Enriquez sa may balisbisan, gitimbaya dayon siya sa iyang mga sakop nga nag-una diay kaniya. Nagkalingaw na kini sa videoke. Didto say pipila ka mga bisita nga wala niya mailhi. Siguro mga partido kadto ni Pablo. Pagkakita ni Pablo ni Mr. Enriquez, iya dayon kining gidala ngadto sa may sala.

"Sir, ang akong Mrs. si Elena ug ang among mga anak si Phillip ug si Paulito," pailaila ni Pablo sa iyang pamilya.

Sa ilang panag-istorya ni Pablo, nasayran ni Mr. Enriquez nga ang maong salosalo usa diay ka thanksgiving kay bag-o pa nga nakapasar si Phillip, ang kamagulangan ni Pablo, sa engineering board exam. Wala lang diay magsabasaba si Pablo sa ilang opisina. Maayo gayud pagkadala ni Pablo ug sa asawa niini ang ilang mga anak, kamatuoran niini mao ang mga nagkalainlaing mga medalya nga iyang nakita sa may sala. Consistent honor students diay sila si Phillip ug Paulito gikan pa sa elementarya. Lahi sa iyang mga anak nga sila si Jerico ug Erika, pareho sa ilang inahan barkada lang ang giatupag. Tungod niini, niabot og pito ka tuig si Jerico sa kursong Commerce samtang si Erika, katulo na nagbalhinbalhin og kurso ug bisan kinsa na lang ang uyab.

Wala tuod makatapos og high school si Pablo pero kamao gayud kini mangartiyo sa kinabuhi. Ang ikaduhang andana sa ilang balay nga sinunod niini sa iyang mga ginikanan, gipaabangan sa upat ka trabahante sa Cirilo's Refilling Station. Sa may ubos niini nga bahin may gihimo nga tindahan nga ang asawa mismo niini ang nag-atiman. Magpautang usab ang magtiayon og P.O. sa mga trabahante sa furniture factory sa ilang duol.

Sa paminaw ni Mr. Enriquez, dako kaayong baligho ang nahitabo sa iyang kinabuhi, siya nga usa ka maayong laki nga manager sa Archipelago Bank wala makahimo pagpatunhay sa dagan sa iyang kaugalingon nga pamilya. Gubot pa sa lokot.

Kalit naputol ang paghanduraw ni Mr. Enriquez. "Sir andam na ang lamesa. Akong gi andam ang imong paborito," ni Pablo pa nga nagngisi. "Sardinas!"

"Bitaw sir, lechon pabo without cholesterol!!" (Kataposan)