Kilometro 35

Gula 87

Ingon sa nawad-an ko’g paglaom nga mabuhi pa. Wala ko magdahom nga mokalit lang og katuis ang panahon ug mopabor ngadto kang Sheldon ang maayong kahigayonan. Kompiyansa ra kaayo ko.

“Demalas ka, Sandra,” giingnan ko ni Sheldon. “Sayop man gud ning lugar nga imong gipili nga anhi ta magkita kay lubnganan man ni sa mga patay. Didto unta ta magkita sa lubnganan sa mga buhi ug gahi aron malipay tang duha. Pero imo man ning gusto. Pwes, ikaw ang mamatay ug dili ako! Adiyos, Sandra!”

Sa wala pa makablit ni Sheldon ang gatilyo sa iyang armas, kalit siyang gidasmagan ni Keith. Naglayog sila. Mora’g maoy tuyo ni Keith nga mabuhian ni Sheldon ang armas nga gigunitan niini. Apan wala gyud buhii ni Sheldon ang armas. Nakigtakos siya sa kusog ni Keith.

“Bang! Bang! Bang! Bang!!!! nakabuto ang armas ni Sheldon. Ug nakita kong nahasarasay si Keith. May samad ang iyang bukton.

Wala ko mag-usik og panahon. Mihamag ko kang Sheldon. Gigamit ko ang pangamot ug paniil nga gitudlo ni Fernan kanako. Nagamit ra gyud nako ang self defense nga gitudlo sa lider sa mga vigilante nako.

Nahalagpot ang armas nga gigunitan ni Sheldon dihang naigo ang iyang kamot sa kalit nakong pagpatid. Dihang misubli ko’g atake, abtik siyang nakalihay ug nanukad. Nanukad sab ko dihang nakabalik na ako’g atubang niya. Mora’g gustong makigsangka si Sheldon nako pinaagi sa mano-mano. Sa iyang lihok, mora’g maantigo sab siyang mangamot.

Tuod man, nagtaksanay mi pinaagi sa mano-mano. Gisurpresa nako si Sheldon. Mora siya’g nabalibag dihang naigo sa makusog kong pagpatid ang iyang apapangig. Mihagsa siya sa yuta nga mora’g saging gituba.

Apan mibangon dayon si Sheldon. Mapungtanon siyang nanukad. Nagliraw sa kasiga ang iyang mga mata nga mitan-aw nako! -- Sumpayan pa