Nahugno nga pangandoy

Ambisyosa ka, Sita! Ambisyosa ka!!! Nagpaminti sa kalagot si Fred nga nagtan-aw sa iyang asawa nga namutos sa mga sinina niini. Buot na niyang patyon si Sita apan mipasulabi gayod sa iyang galamhan ang gugma niya niini.

Walo na sila ka tuig nga nag-ipon isip magtiayon apan wala gayod niya madapati bisan usa lamang ka higayon si Sita kay gimahal ug gipangga gyud niya ang iyang asawa.

“Pasayloa ko, Fred...” Pintok ang tingog ni Sita, “Apan mao na kini ang higayon nga matuman ang dugay ko nang gipangandoy. Sapian ang Kano nga akong uyab ug siya lamang ang makahatag kanako sa tanan kong gipangandoy nga kabuhong!” Gipunit ni Sita ang bag nga nagbutirik sa kapuno. “Adto na ko ug hinaot nga dili ka mangita og laing babaye samtang wala ko dinhi. Hinaot nga paaboton mo ang akong pagbalik kay nianang higayona salohan nato ang kabuhong sa salapi nga ako unyang makuha!”

Mitulo ang mga luha ni Fred nga nagtan-aw sa mipalayo niyang asawa. Dili siya makatuo nga mabuhat kini ni Sita kaniya. Nasayod si Sita sa kadako sa iyang gugma ug gani, nabuhat na niya ang tanang paningkamot aron lamang mahatag sa asawa ang kabuhong nga dugay na niining gipangandoy. Apan bisan giunsa niya wala gyud niya kini maabot. Wala man gud siya makatapos sa hayskol ug sa konstraksiyon lamang siya nagtrabaho.

Tungod sa mao nilang kawad-on naaghat si Sita pag-apil sa ‘friendster’ sa internet ug nakauyab dayon siya og Kano. Ug may gisulti si Sita kang Fred kabahin sa uyab niining Kano. Maoy sulti ni Sita kang Fred nga kuhaon siya sa Kano ug dad-on sa Amerika ug magpakasal sila didto. Gipatuo man gud niya ang Kano nga dalaga pa siya.

Sa ila na unyang panag-ipon sa Kano isip magtiayon, buhaton dayon ni Sita ang tanang paagi aron magkabulag sila ug ang Kano. Kay kun mahitabo na unya kini makaangkon na siya og bahin sa katigayonan sa Kano. Ug human unya niini, mopauli siya sa Pilipinas ug mobalik kang Fred. Ug silang duha si Fred unya ang magpahimulos sa salapi nga iyang makuha.

Mihugpa na ang kangitngit sa dihang miabot si Sita sa dako ug inilang hotel sa Sugbu diin didto usab nagpaabot kaniya si James –ang Kano nga iyang uyab. Gisugat dayon siya ni James ug gidala ngadto sa giokupar niining lawak sa hotel. Ug didto sa sulod sa maong lawak natagamtaman ni Sita ang kalami nga wala gayod niya matagamtami gikan sa gamay pa siyang bata. Karon pa gayod siya makasulod og usa ka luho nga hotel. Ang tanang pagkaon nga gisaw-an nila ni James niining higayona wala gyud niya matilawi sukad lakip na ang mahalon ug imported nga bino nga gitagay nilang duha sulod sa lawak. Ug ang kabuhong niya sa maong mga butang hinayhinay nga mitukmod kaniya sa pagpakasala. Hangtod nga lain na sab nga matang sa pagkaon ang subli-subli nilang gitilawan ug gisaw-an ning higayona ug kini mao ang pagkaong lawasnon. Gitagbaw nila ni James ang kauhaw nila sa usag-usa ibabaw sa mahunol-hunol nga kama!

Buntag na dihang nahigmata si Sita. Nabatyagan niya karon ang tumang kakapoy gumikan sa kombate nila ni James ibabaw sa kama. Midali siya’g bangon sa dihang naalinggatan niyang wala si James sa lawak. Gisul-ob dayon niya ang biste nga gihubo niya kagabii ug migawas.

“Kaganina pang milakaw ang Kano nga kauban mo sa lawak, Mam.” Sa roomboy pa sa dihang iyang gipangutana.“Nanugon gani to siya nga sultihan ka inigmata mo nga mopauli na lang ka sa inyo kay milarga siya balik sa Amerika!”

Mitibi si Sita tapos madungog ang gisulti sa roomboy. Unya mibalik siya sa lawak. Gikuha niya ang bag nga puno sa iyang mga sinina ug nagdaling migawas sa hotel. Hanap ang iyang panan-aw kay nalukop sa mga luha ang iyang mga mata.  (Kataposan)