Sukli sa utang

 Gula 246

Si Mar gisikop sa kapolisan sa lungsod sa Mabini human kini malutsig warrant of arrest sa hukmanan. Siya’y gitumbok nga suspek sa pagpatay sa midwife ug positibo siyang gitudlo sa duha ka silingan sa biktima kinsa nakakita sa iyang paggawas sa balay niini agi sa pultahan sa kusina niadtong sayong buntag pipila ka minutos sa wala pa madiskobrehi sa anak niini ang biktima nga wala nay kinabuhi.

Nakugang ko’s makadiyot human masayod sa balita. Pero kadiyot rang mibalik sa normal ang panghitabo alang nako. Nakaingon hinuon ko nga mirisi. Nalipay ko sa gidangatan ni Mar kay sa maong hitabo, hingpit na man kong makalingkawas sa iyang pagpahimulos sa akong lawas ug salapi. Maayo ra untag madugta siya sa bilanggoan.

Mora ko’g naibtan og tunok sa nahitabo kang Mar. Daotan gyud diay siya nga pagkatawo. Dili magduhaduha sa pagpatay makuha lang ang iyang gusto. Maayo gani kay wala ko niya patya dihang nagpagahi-gahi ko’g hatag og kuwarta ngadto kaniya. Wala pa gyud tingali itugot sa kahigayonan nga mahitumpawak ko sa hingpit nga kadaotan.

Ang nahitabo namo ni Mar giisip ko na lang nga usa ka makalilisang nga daman nga nahitabo sa akong kinabuhi. Nagtuo kong dili na siya makahunahuna pagbulgar sa akong tinagoan nga iyang nasayran kay may lain na man siyang problema nga giatubang. Bug-at ang kaso nga gipasaka sa mga tagtungod sa midwife nga gipatay batok kaniya.

Miabot ang bulan sa Disyembre. Sama sa Disyembre sa miaging tuig, gipabakasyon na sab ko ni Ferdinand sa Manila aron adto ko mamasko. Gimingaw na ko ni Ferdinand mao nga init kaayo ang among paghangpanay dihang nagkita na kami. Gimingaw na sab kuno siya nako.

Aron pagpahungaw sa among kamingaw sa usag-usa, si Ferdinand wala mo-report sa iyang trabaho nianang pagkabuntag human sa akong pag-abot. Nasayod kong pareho ming gimingaw sa usag-usa. Kun gihidlaw ko sa lawasnong kalipay, labaw na tingali siya.

Mao nga diha ra mi sa unit nga iyang giokupar sa UCV Building sa Binondo sa tibuok buntag. Wala mi laing gihimo kondili ang pagsubli og katkat sa hagdanan paingon sa ikapitong langit. Tugob sa kainit ang among panagtagay sa lawasnong kalipay.

Pagkapalis, human sa paniudto, nanuroy mi sa Star City. Samtang nalingaw ko’g tan-aw sa lainlaing mga talan-awon, may nanguhit sa akong luyo. Ug nakugang ko dihang ako na kining nailhan. -- Sumpayan pa