Sukli sa utang

 Gula 245

Human sa among mainitong romansa nangayo nasab siya og kuwarta.

Wala dayon ko mohatag og kuwarta kang Mar. Nangayo ko’g katin-awan kun unsay gastohan niya sa kantidad nga pangayoon niya gikan nako.

“May manok hiniktan ang among silingan nga gihanyag nako,” mipasabot si Mar. “Paliton to nako kay maayo’g kaliwat tong manoka. Talimuno.”

“Sa tanan na ba lang gyud nimong kinahanglanon, Mar, ari ka nako magyangungo? Giingnan ko siya.

“Porbida sad nimo, uy! Asa man diay ko modangop? Sa laing tawo?”

“Sa imo diay’ng asawa?”

“Hinay nag raket ang akong asawa karon. Mao bitaw nga pagahatagan ko sab siya’g kuwarta usahay kun madako ang ihatag mo nako.”

Aron walay mahitabong kagubot, mihatag na lang ko sa gipangayong kuwarta ni Mar. Lisod nag mag-eskandalo siya kun akong balibaran. Ako’y dehado kun mabulgar ang akong tinagoan.

Nanglabay ang mga adlaw. Nagpadayon si Mar sa pagpanghukhok nako. Sama sa nakaigo og duha ka langgam sa usa lang ka bato ang kanahan kay gawas sa kuwarta nga akong idatong niya, nagpadayon man usab siya sa pagpahimulos sa akong pagka babaye.

Usa niana ka buntag, ingon sa naukay ang katawhan sa Tambo nga akong mga silingan. Mora’g nagkagubot sila. Kadali rang mikaylap ang mga tabi-tabi nga may babayeng gipatay didto sa Banlas, ang barangay nila ni Mar. Usa ka midwife ang gipatay. Usa ka seaman ang bana niini nga nanakay sa barko nga pang-abroad.

Sumala sa gisawo-sawo nga estorya, patay nang nakaplagan ang biktima sa sais anyos niyang anak sulod sa lawak niini pagkabuntag kanus-a nasabwag sab dayon ang balita. May samad nga agi sa dunggab ang dughan sa midwife nga gipatay. Gituohan nga gitulis ang maong midwife kay naukadyang man ang mga butang sulod sa lawak niini ug abli na ang tanang mga butanganan og kuwarta. Nawagtang usab ang mga alahas sa biktima.

Gihingusgan sa kapolisan sa lungsod sa Mabini ang pag-imbestigar sa maong kaso. Ang mayor sa lungsod sa Mabini mitanyag og salaping cash isip pahalipay sa makatudlo sa responsable sa kamatayon sa midwife. Daghan ang nahinugon sa maong midwife tungod kay usa kini sa labing kugihan nga kawani sa municipal health center sa lungsod sa Mabini sa buhi pa kini.

Paglabay sa kapin sa usa ka semana, nabalitaan ko na lang nga gisikop si Mar sa kapolisan. -- Sumpayan pa