Sukli sa utang

 Gula 243

Morag wala ko makasabot sa dagan sa utok ni Thelma. Kun ang uban pa tingaling mga asawa ang nahimutang sa iyang dapit, seguradong magbahis ug mag-alingit na kay nahibaloan na man niya ang pagpangabit sa iyang bana. Seguradong mabugnoan pa ang kerida sa iyang bana nga iya na diay nga nailhan -- nga mao ako!

Apan lahi si Thelma. Ingon sa wala lang niya hatagi’g gibug-aton ang pagluib ni Mar sa ilang kaminyoon. Liberated kaha siya’g hunahuna? Sports-minded ba kaha siya o unsa pa dihang mga termino nga mohaom sa pag-illustrate ug pag-described sa iyang pagka-asawa?

“Nasayod ka na diay sa real score namo ni Mar?” Gipangutana ko si Thelma sa tingog sa tugob sa kaseryoso.

“Oo,” laktod niyang tubag. “Wa may gitago nako kanang tawhana.”

“Wa ka magselos?”

“Di na uso ron ang pangabubho. Sakit-sakit lang nas dughan. Sa gikaingon ko na kaganina, nalipay kong nagkarelasyon mo.”

“Nga-ngano man?”

“Badlongon kaayong pagka bana alang nako si Mar. Way trabaho. Ako pa gani nagbuhi niya. Sugal maoy gikabuangan. Kun way ikapuhonan, kawaton niya ang akong kinitaan sa pag-manicure. Pero karon nga nagkarelasyon mo, di na siya mangawat sa akong kuwarta. Siya pa gani hinuon ang mohatag nako alang sa pangunsomo. Kuwartahan na man siya kanunay kay di man kuno ka tihik mohatag og datong.”

 Wala ko makatingog. Mora’g namula tingali ang akong nawong kay sa akong pamatyag nanginit man ang akong aping. Sa hilom mibati ko’g kalagot sa akong nadungog gikan kang Thelma.

   Nakasabot na ko sa tanan. Mao diay nga wala masuko si Thelma sa pagpakigrelasyon ni Mar nako kay nakapahimulos man usab diay siya sa kuwarta nga akong gidatong ngadto sa iyang bana. Posible pa gani nga may sinabotan sila mahitungod sa pagpakigrelasyon ni Mar nako mao nga kursonada kaayo ang iyang bana nga mangayo nako’g kuwarta.

Ila lang diay kong gitonto! Gipahimuslan nila ang pabor sa higayon nga ilang naangkon aron makakuwarta sila nako. Ang kasayoran nga gihuptan ni Mar bahin sa pagpakigrelasyon nako kang Lorte kaniadto maoy gihimo nilang alas aron makapadayon sila sa pagpanghukhok nako. Ug libre pa gyud si Mar sa pagpahimulos sa akong pagka babaye.

Mga salbahis sila! -- Sumpayan pa