Kilometro 35

Gula 81

Nakasabot ko nga mora’g dili makatuo si Keith sa akong gisulti kaniya. Daw dili siya makatuo sa akong kaprangka ug kapraktikal na. Labaw sa tanan, ingon sa dili siya makatuo sa akong nabuhat nga paggamit sa akong pagka babaye sa pagpasalamat sa mga tawong nautangan nako’g kabubut-on.

“Ako na usab ang mangutana nimo, Keith?” Giingnan ko siya.

“U-unsa kana, Sandra?” Misumbalik siya’g pangutana.

“Karon nga may nahitabo na natong duha, gusto kong motug-an ka sa tinuod. Ang tinuod gyud.”

“Bahin sa unsa?”

“Kun tinuod ba ang imong gisulti nga wa ka gyud moapil paglugos nako. Tug-ani ko’s tinuod.”

“Wa ka pa ba diay gihapon motuo sa akong gisulti?”

“Gusto lang kong maneguro.”

“Tinuod ang akong gisulti, Sandra. Gawas nga nahadlok ko paghimo sa maong salaod, di sab ko makahimo pagpahimulos sa kahuyang sa usa ka babaye. May mga igsoon sab kong babaye. Nakaseguro kong di lalim ang akong bation kun ang akong mga igsuon maoy buhatan sa ingon.”

Sa akong nabati, nakadayeg ko sa kaligdong ni Keith. Ingon sa dili sab ko makatuo nga luyo sa iyang pagpakigbarkada kang Sheldon nagbaton diay siya’g tinagoang kabuotan ug katarong.

Inanay nga mitaas ang akong pagtan-aw sa pagkatawo ni Keith. Alang nako, usa na siya ka knight of shining armor sa akong kinabuhi.

Tungod sa naghingapin kong pagdayeg kaniya, gigakos ug gihagkan nako si Keith. Ug ang akong gihimo maoy nahimong pabilo sa mas init namo nga pagpinarayganay. Gisubli namo pagtagay ang kalalim sa lawasnong kalipay. Gusto kong tagbawon si Keith bugti sa iyang pagluwas sa akong kinabuhi. Gusto sab kong maglipay uban kaniya sa mainitong kombate ibabaw sa kama! -- Sumpayan pa