Ang gugmang gibati ko

Aron matambalan ang pakyas nga gugma ni Shing. Gipili niya nga magpakalayo kay dili niya kayang saksihan ang kasal sa iyang hinigugma ngadto sa uyab niini nga si Diana.

Si Shing usa ka maanyag nga dalagang journalist nga nahigugma sa iyang inilang igsuon nga ginganlan og Xander. Si Xander usa ka pulis sa dakbayan. Pareho silang nakahibalo nga dili sila tinuod nga managsuon kay gisagop lamang si Shing sa inahan ni Xander.

Apan bisan sa kamatuoran, gihigugma gayud ni Xander si Shing sama sa tinuod nga igsuon. Ang wala niya mahibaw-i nga ang dalaga naa diay gitago nga pagbati ngadto kaniya.

Dali nga nahugno si Shing pagkahibalo nga magpakasal na diay si Xander kang Diana. Nagtuyok na ang kinabuhi ni Shing sa pag-inum, sugal ug druga. Bisan kapila man kini istoryahan sa ilang inahan nga si Norma, dili gayud maminaw si Shing.

Nagproblema og maayo ang ilang inahan ug gisaysay nalang niini ngadto kang Xander ang tanan bahin sa pagbati ni Shing ngadto kaniya. Mihangyo ang ilang inahan nga dili nalang magpakasal si Xander ngadto kang Diana ug tudluan nalang ang kaugalingon niini nga higugmaon si Shing kay dali raman kining higugmaon.

"Dili kana mahimo, Ma, gimahal ko si Diana, siya ang akong kinabuhi. Sige lang Ma kay istoryahon ko si Shing bahin niini," matud pa ni Xander.

Pagkagabii niana giistoryahan ni Xander si Shing gipasabot niya kini og maayo apan wala gayud kini naminaw.

"Gihigugma ko ikaw Xander labaw pa sa akong kinabuhi. Wala ba diay ako'y bili kanimo? Dili ko gustong mawala ka nako Xander," matud pa ni Shing nga naghilak.

"Importante ka kanamo ni mama Shing. Apan dili ko mapugos ang akong kaugalingon nga higugmaon ka kay sama ra gayud sa usa ka igsuon ang gibati ko alang kanimo. Sabta ko Shing, dili ra ako ang laki niining kalibutana. Naay daghan laki nga nabagay kanimo," tubag ni Xander.

Milabay ang pila ka buwan, kasal na gayud ni Xander ug Diana, dili kayang magsud-ong ni Shing sa kasal sa lalaking una niyang gihigugma sa tibuok niyang kinabuhi, mao nga nagpakalayo-layo na lamang siya. Nagbilin og sulat nga dili dapat maguol sila si Xander ug ang iyang inahan kay mobalik ra siya kung madawat na niya ang tanan.

Sa iyang pagkalayo aron makalimtan ang tanan nabutang sa disgrasya ang iyang kinabuhi tungod kay nabanggaan siya sa sakyanan. Gidala siya sa tigulang sa balay niini ug gipatambalan. Apan matud pa sa doctor may amnesia si Shing tungod sa ka kusog sa impact nga pagkabangga niini sa sakyanan.

Milabay ang pila ka bulan naabot ang anak ni Donya Lilac nga ginganlan og Dux. Gipaila sa Donya nga uyab kini ni Shing. Dakong pagkahibulong ang nabatyagan ni Dux ug gikompronta niini ang iyang inahan kung nganong gibuhat man niini kadtong butanga.

Gisaysay sa Donya ang tanan nga panghitabo. Milabay ang unom ka buwan nahulog na gayud si Dux ug Shing sa ilang pagbati. Naangkon ni Dux ang tanan ug miingon sa iyang kaugalingon nga lahi gayud si Shing sa tanan nga babaye nga iyang nakarelasyon. Nahuman ang usa ka tuig mibalik na gayud ang memorya ni Shing.

Gikumpronta niini si Dux sa tanan nga panghitabo.

"Shing wala ko'y pagbasol nga gibuhat ko katong tanan kay gihigugma ko ikaw, andam kong buhaton ang tanan Shing alang kanimo. WILL YOU MARRY ME SHING?" matud pa ni Dux. Gitubag siya ni Shing pinaagi sa halok ug mahigpit nga gakos. Yes, I will Dux ... I will marry you!!! (Kataposan)