Sukli sa utang

Gula 238

Wala mi’y gawas-gawas sa hotel nga among gitsek-inan. Naglikay mi si Mar sa bulilyaso. Nanagana lang mi. Dili ra ba matagna ang panahon. Tingalig dunay taga Mabini o ba kaha taga Tambo mismo nga makakita namo nga nag-uban. Maong wala gyud mi mokompiyansa.

Nagpa-room service lang mi sa among pagkaon ug ubang panginahanglanon. Wala miy laing gihimo sulod sa among lawak sa hotel gawas sa pagpunay og tagay sa lawasnong kalipay. Gusto ming matagbaw gayod pag-ayo ang among kauhaw ug kahangol sa unodnong himaya.

Pagkaugma, tangkod nga 24 oras sukad sa among pagtsek-in, mi-check out na mi si Mar. Mamauli na mi sa Mabini. Pero wala mi magkuyog paingon sa terminal sa mga bus. Akoy nag-una paingon didto. Si Mar nagpaulahi. Gibanabana lang niya nga dili siya mabiyaan sa kataposang biyahe sa bus paingon sa Mabini.

Ang kinawatkawat nga panagtagbo namo ni Mar ingon sa gibuligan kanunay sa panahon maong nasubli kini sa makadaghan. May mga gabii nga mohinok siya’g sulod sa balay agi sa pultahan sa kusina nga tuyoon gyud nako nga dili isira. Sa higayon nga magkobra ko sa kuwartang ipadala ni Ferdinand sa banko, magtagbo sab mi didto sa Tagbilaran.

Ingon sa walay katagbawan ang among kahangol sa unodnong kahinam. Daw wala nay kahumpayan ang among lawasnong panginahanglan. Mora’g wala nay kataposan ang among pagdula sa kalayo kay samtang nagkadugay, ingon sa dili na man hinuon kami makatugot nga magkalagyo sa usag-usa.

Hangtod nga miabot ang higayon nga ingon sa nag-abuso na si Mar sa among relasyon. Morag gusto na ko niyang hukhokan. Daghan siya’g mga alibi aron mohatag ko niya’g kuwarta.

“Wala ko’y ipuhonan ron sa buwangan,” nagkanayon si Mar usa ka higayon niana. “Pausla una ko’g mga P2,000.”

“Kadako gud ana?” Mireklamo ko.

“Gamay ra man nang kantidara, ba. Bayran ko lagi ka kun makadaog ko.”

“Unyag, mapilde....di diay ko nimo bayran?”

“Bayran gihapon, pero madugay-dugay pa.”

Supak sa akong kabubut-on ang paghatag ngadto kang Mar sa gipangayo niyang kantidad apan mihatag na lang ko dihang giganahan ko sa iyang mga parayeg nako. Natandog ni Mar ang akong kahuyang maong milampos siya sa pagpanghulam nako og kuwarta. -- Sumpayan pa