Kaparotan luyo sa kadaugan

Sige Fred, Ernesto, Erlan ug mga bata-bata paglipay ug paghudyaka kamo karong gabhiona kay karong adlawa ato ra gayong nabuntog ang atong kaaway nga mao ang mga rebeldeng Muslim! matud pa ni Koronel Robinson ngadto sa iyang mga sakop nga mga sundalo nga gikan pa sa usa ka dakong kombate.

Tuod man nagpadayon sila sa pagkaon sa mga lamiang potahe, inom sa bino ug alak nga gikan sa gawas, kanta ug sayaw hangtod sa pagka kaadlawon. Diin natapos gayod ang ilang dakong selebrasyon sa kadaugan.

Apan si Koronel Robinson ug ang iyang pinili nga mga junior officers sa kasundalohan nagsigi gihapon sa pag-inom hangtod sa kabuntagon.

Dili matukib sa mga pulong ang ilang gibati nga kalipay sa diha nga sa kataposan ila ra gyod nga nabawsan ang linuog nga gibuhat kanila sa rebeldeng mga Muslim.

Sa miaging bulan, ang ilang taas nga mga opisyales nga naglangkob og tulo ka heneral ug unom ka koronel gibanhigan sa mga armadong mga rebeldeng Muslim. Sa siyam ka mga opisyales nga gibanhigan, duha ra gyod ang nakaikyas. Usa ka heneral ug usa ka koronel. Nakaambak sila gikan sa mga pangpang nga gilabay og granada sa mga kaaway.

Apan, kagahapon napalgan ra gayod sa mga sakop ni Koronel Robinson ang tagoanan sa ilang mga kaaway. Nga ila dayong gisulong ug gialirongan. Unya sa tumang kapungot ila dayon kining gipaulanan og mga bala ug gisunog ang ilang daghan apan gagmay nga mga balay taliwala sa mangiob nga kagabhion.

Hangtod nga niampo gayod kanila ang mga kaaway nga ila dayong gipusasan ug gipasakay sa ilang mga sakyanan.

Apan ang kamaya ug kalipay ni Koronel Robinson kalit lang nahanaw sa dihang usa sa iyang mga sakop niduol kaniya ug nitaho og daotang balita.

"Naapil si Brenda pagkaigo sa mga high powered nga mga armas sir," matud pa ni Tenyente Felino nga nagbutyag sa masulob-ong balita.

"Unsa? Dili kana tinuod dili!" matud pa ni Koronel Robinson nga nakalitan sa taho ug dili makadawat niini. Tungod sa hilabihang kaguol nga iyang gibati nibiya siya sa pag-inom ug mipaingon sa iyang lawak. Ug didto niluom sa paghilak daw bata nga giilogan sa iyang duwaan.

Napamalandong karon ni Koronel Robinson nga hubog na niadtong panahona, nga kadtong adlawa dili diay timaan sa kadaugan kun dili kaparotan. Kay mag-unsa man ang kadaugan nga imong maangkon kun wala na ang babaye nga maoy natingban sa imong tim-os nga gugma ug way kamatayon nga pagmahal. (Kataposan)